Hakerat kanë targetuar sistemin e emaileve të Parlamentit të Britanisë, në përpjekje për të hyrë në llogaritë e qindra deputetëve, lordëve, ndihmësve dhe stafit.
“Parlamenti ka zbuluar përpjekje të paautorizuara për të hyrë në llogaritë parlamentare”, tha një zëdhënës i Parlamentit për The Independent.
“Jemi duke e hetuar këtë incident dhe duke bërë përpjekje për ta siguruar rrjetin kompjuterik, duke bashkëpunuar me Qendrën Kombëtare për Siguri Kibernetike”, tha ai.
Për sulmin kibernetik u njoftuan anëtarët e Parlamentit, të cilët thanë se nuk ishin në gjendje që të hynin në emailet e tyre këtë mëngjes. Sulmi erdhi disa ditë pas raporteve se hakerët rusë kanë vjedhur fjalëkalime që iu përkasin ministrave, ambasadorëve dhe zyrtarëve policorë – duke i vendosur në shitje online.
