Persona të papërgjegjshëm po vazhdojnë të më- syjnë mbi hekurudhat, të cilat janë drejt shkatërrimit dhe rrezikojnë jetën e qindra qytetarëve, që lëvizin ende me këtë mënyrë transporti. Hekurudha po bastiset në masë për skrap, ndërsa rasti më i fundit ka qenë pak ditë më parë. Në afërsi të lagjes “Mbrostar Ferko” janë vënë re dëmtime të dukshme në të dyja anët e hekurudhës.
Skrapi i tërhequr ka qenë kryesisht në bulona, pasi këto të fundit zënë pak volum dhe peshojnë më shumë. Edhe vetë qytetarët e shfaqin këtë shqetësim pasi, sipas tyre të ndikuar edhe nga ekonomia e dobët, ata herë pas here janë të detyruar të udhëtojnë edhe me tren.
“Mbase janë të detyruar qytetarët që të udhëtojnë me tren, pasi ekonomia ka shkuar në fund. Por kur hekurudha është e dëmtuar deri në këtë gradë, rrezikohet jeta e qytetarëve. Ky është një problem i madh. Natën këtu bëhet kërdia dhe askush nuk mban përgjegjësi. Shkulen pllakat me zhurmë të madhe, por me sa duket askush s’i sheh”, shprehet Endrit Lushkaj. Sipas qytetarëve, vetëm funksionimi i mirë i ligjit do t’i çonte përballë përgjegjësisë keqbërësit.
“Policia duhet të marrë masa dhe të mos e lërë situatën në këtë gjendje që është. Nëse do të kapet dhe të dënohet një person, atëherë do të tremben të tjerët dhe do të stepen. Por kur ligji nuk funksionon, kështu do të bëhen gjërat”, shprehet një tjetër banor i kësaj lagjeje, Nazmir Gerbi. Raste si kjo e fundit janë shfaqur shpesh në zonën e Fierit, ku më së shumti hekurudha është dëmtuar në pjesët më pak të populluara dhe gjithmonë vepra penale kryhet natën.
Në Libofshë përpara disa muajsh ndodhi i njëjti fenomen, po ashtu edhe në rrugën e Vlorës, pranë lagjes së romëve. Por ndonëse e njëjta histori po përsëritet, ende nuk ka asnjë person të vënë përpara përgjegjësisë. Edhe pse nga ana e punonjësve të hekurudhës janë denoncuar disa herë raste të vjedhjeve të pllakave dhe bulonave lidhëse, nga ana e policisë nuk ka të arrestuar. “Vazhdimisht konstatohen se bulonat e shinave vidhen. Qytetarët nuk e kuptojnë që këto vjedhje dëmtojnë pasuritë e tyre”, shprehen burime nga Hekurudha./panorama/a.k
