Dy vende, nga 27 në total me të drejtë vote për negociatat me Shqipërinë dhe Maqedoninë e Veriut, nuk janë bindur ende për të dhënë dritën jeshile për hapjen e bisedimeve.
Në konferencën e mbajtur pas takimit të ministrave të Jashtëm të BE-së, Komisioneri Europian për Zgjerimin, Johannes Hahn, tha se 25 vende kanë shprehur dakordësi.
I pyetur nëse një “Jo” për Shqipërinë për negociatat do të ishte për shkak të problemeve të brendshme në Tiranë apo problem i brendshëm i BE, Johannes Hahn u përgjigj duke thënë se situata politike në Tiranë nuk ishte më e mira.
“Të gjithë shtetet kanë rënë dakord që të vendosin disa kushte që duhen plotësuar nga të dy vendet dhe sipas vlerësimit tonë, ata i kanë përmbushur. Ishin kushte të qarta dhe sipas nesh janë përmbushur. Por vendimi final përfshin edhe elementë politikë, që nuk janë pjesë teknike.
Sigurisht që situata politike e brendshme në Shqipëri nuk ndihmoi. Mendoj që duhet të tregohemi të drejtë me njëri-tjetrin në këtë proces. Duhet t’i mbushim mendjen qeverive të të gjitha vendeve anëtare”, u shpreh komisioneri Hahn.
