Genis Mëhillaj, i dënuar në mungesë me 10 vite burg dhe i kapur pak ditë më parë nga policia e Tiranës si një nga pjestarët e grupit të tritolit në Vlorë, kërkon të rigjykohet.
Sipas tij, ai pretendon se është i pafajshëm dhe se nuk ka asnjë lidhje me kushëririn e tij Andon Mëhillaj dhe vrasësin me pagesë Julian Sinanaj.
Vetëm 10 ditë pasi ai është arrestuar, Genis Mëhillaj i është drejtuar me një kërkesë gjykatës së Krimeve të Rënda, duke kërkuar prej saj të rivendosë në afat të së drejtës së ankimit ndaj vendimit penal. E thënë ndryshe, Genis Mëhillaj kërkon nga kjo gjykatë që ta rigjykojë për herë të dytë dosjen penale kundër tij, pasi në gjyqin e parë ai ka qënë në mungesë.
Kërkesa mban numrin 104 dhe është rregjistruar në sekretarinë e kësaj gjykate në 16 mars 2017. Pritet që në ditët në vijim gjyqtari Luan Hasneziri, të dalë me një vendim konkret nëse do pranojë ose jo kërkesën e Genis Mëhillaj. Nëse gjykata pranon kërkesën, atëherë dënimi me 10 vite burg ndaj tij bie, dhe gjykimi fillon nga e para.
Së bashku me Genis Mëhillaj, prokuroria dënoi kushëririn e tij Andon Mëhillaj me burgim të përjetshëm, Julian Sinanin me 35 vite burgim, Ndriçim Gjokonën, biznesmenin e gazit Ilir Karcinin, biznesmenin Marjon Mitro dhe dy persona të tjerë.
