Gent Strazimiri, Flamur Noka dhe Arben Ristani kanë dalë sot në një konferencë për mediat, për të reagur rreth akuzave të Lulzim Bashës sa i përket 4300 firmave të delegatëve.
Strazimiri tha se kush është kurioz, mund të shkojë t’i verifikojë firmat tek zyra e Edi Palokës. Ky i fundit, sipas Strazimirit, është numri dy i PD-së për aq kohë sa mban postin e kryetarit të Këshillit Kombëtar.
Ish-deputeti i PD shtoi se puçisti në këtë rast është Lulzim Basha që po tenton të mos i bindet vendimit të delegatëve për mbledhjen e Kuvendit.
Ndërkohë, Flamur Noka tha se po tentojnë t’i japin një mundësi Lulzim Bashës që të kthehet në binarët e demokracisë. Sipas tij, Basha është në panik.
“Zoti Basha është palë. Sekretari i Përgjithshëm Gazment Bardhi është palë e tij. E parashikon statuti të drejtën e vetëmbledhjes. Mos prisni që shumica të paraqitet në rresht para pakicës. Ne për transparencë ndaj demokratëve i dërguam firmat të Këshilli Kombëtar, i vetmi institucion i konstituar i Partisë Demokratike” – tha Noka.
Më herët Lulzim Basha e akuzoi Sali Berishën si palë me Edi Ramën, që po tentojnë t’i bëjnë puç PD-së. Ai u shpreh se Berisha luajti blofin me firmat e mbledhura.
/JavaNews/a.r
