Socialistët dhe demokratët në Parlamentin Europian i kanë kërkuar gjermanes Ursula von der Leyen, kandidate për kreun e Komisionit Europian, mbështetje për hapjen e negociatave me Shqipërinë si pjesë e axhendës së tyre të prioriteteve.
Der Leyen-n që të emërohet në detyrën e rëndësishme të Bashkimit Europian, duhet të marrë mbështetjen e eurodeputetëve në Parlamentin Europian.
Socialistët dhe Demokratët (S&D), që është edhe grupi i dytë më i madh në PE, pasi dorëzuan axhendën e prioriteteve thanë se nëse Von der Leyen bie dakord me prioritetet e S&D, atëherë deputetët do të votojnë për emërimin e saj.
Pjesë e agjendës së S&D është edhe hapja e negociatave për anëtarësimin e Shqipërisë dhe Maqedonisë së Veriut në Bashkimin Europian. Grupi i dytë më i madh në PE kërkon nga ministrja e Mbrojtjes ende në detyrë e Gjermanisë që të mbështesë hapjen e negociatave me dy shtetet ballkanike.
Vetë Ursula von der Leyen ka deklaruar më parë se dera mbetet e hapur për Tiranën dhe Shkupin.
Ajo kërkon të zgjidhet në krye të KE-së, institucion që ka rekomanduar disa herë hapjen e negociatave.
Votimi në Parlamentin Evropian, për kandidaturën e 60 vjeçares, është parashikuar të bëhet më 16 korrik.
