Gruaja e Lefter Zhidrut, Floresha Zhidru është paraqitur bashkë me disa familjarë në morgun e Elasanit, për të marrë trupin e pajetë të 71-vjeçarit të ekzekutuar pasditen e djeshme nga forcat RENEA, pas shkëmbimit të zjarrit.
Familjarët kanë vendosur që trupi i pajetë i të moshuarit, të përcillet në banesën e fundit, në fshatin Xarë të Sarandës, vend ku dhe kishte lindur.
Ishte gruaja e të ndjerit Floresha, ajo që mesditën e djeshme, njoftoi policinë, pasi bashkë me vajzën 14 vjeçe, ndihej e kërcënuar nga Lefteri, i cili ishte i armatosur dhe kishte kallëpe tritoli.
Por ndërhyrja e policisë pas sherrit në familje, nuk përfundoi mirë, pasi 71-vjeçari nisi të qëllojë drejt uniformave blu, ku pas rezistencës së bërë për pesë orë me radhë, u ekzekutua nga forcat RENEA, ndaj të cilave edhe në çastet e fundit nuk i kurseu plumbat.
I moshuari kishte qenë ish-punonjës i fabrikës se armëve në Mjekës të Elbasanit dhe kjo kishte bërë që të kishte njohuri mbi armët dhe municionet.
Pas largimit nga puna për shkak edhe të moshës, ai kishte nisur të punonte si gomist.
Mësohet se Lefter Zhidru kishte rreth pesë vite që ishte transferuar për të jetuar në lagjen “11 Nëntori” në Elbasan, bashkë me gruan dhe vajzën e tyre.
Ai njihej si natyrë problematike, madje në muajt e fundit, kryesisht gjatë pandemisë së koronavirusit, ishte proceduar disa herë për dhunë ndaj së shoqes, ku policia e kishte proceduar penalisht, por e lironte sërish.
Floresha, ishte gruaja e tretë e Leferit, me të cilën vijonte jetesën deri ditën e djeshme, pavarësisht problematikave mes tyre.
Ai kishte qenë i martuar dy herë të tjera më parë, ku me njërën nga gratë ka edhe një djalë në moshë madhore, i cili jeton në emigrim.
Zhidru njihej si natyrë e dhunshme, madje këtë gjë e pohojnë edhe fqinjët, të cilët dëgjonin vazhdimisht sherre dhe britma, nga banesa e çiftit.
/a.r
