Eshtë rënduar bilanci i viktimave nga virusi i gripit, duke shkuar në 7 numri i personave që kanë humbur jetën në vendin tonë. Ministria e Shëndetësisë deklaroi sot se dy raste te tjera u shënuan në Vlorë dhe në Korçë, ku 2 të moshuar kanë ndërruar jetë. Po këto burime pohojnë se shtetasja me inicialet S. S., 82 vjeç, banuese në Vlorë, ka ndërruar jetë në datë 14 janar në spitalin e Vlorës, ndërsa shkak është bërë virusi i gripit stinor A. Po ashtu, dje ka humbur jetën dhe shtetasja me inicialet V. B., 71 vjeç.
MINISTRIA E SHENDETESISE:
Pacientja S. S., 82 vjeç, banuese në Vlorë, shtruar në shërbimin infektiv, dhe më tej në reanimacionin e spitalit rajonal të Vlorës në datë 01/01/2017, me diagnozë, “Insufiçencë multiorganore, post-gjendje febrile,” ka ndërruar jetë në datë 14/01/2017. Mostrat e ekzaminuara nga Instituti i Shëndetit Publik konfirmojnë se pacientja ishte e prekur edhe nga virusi i gripit stinor A.
Pacientja V. B., 71 vjeç, banuese në Korçë, e shtruar në spitalin e Korçës më datë 09.01.2017, me diagnozë: “Insufiçencë multiorganore, Meningoencefalit, Sëmundje Renale akute, Pneumoni masive sinistra”, ka ndërruar jetë në orët e mbrëmjes së datës 16.01.2017. Mostrat e ekzaminuara nga Instituti i Shëndetit Publik, konfirmojnë se pacientja ishte e prekur edhe nga virusi i gripit stinor A.
Arrin në shtatë, numri i rasteve të konfirmuara, pas dy rasteve të raportuara në dt. 05/01/2017, atij të datës 11/01/2017, rastit të datës 13/01/2017 dhe rastit të mëngjesit të sotshëm (dt. 17/01/2017), nga Ministria Shëndetësisë për persona që kanë ndërruar jetë, të cilët, përveç sëmundjeve të tjera, kanë rezultuar të prekur edhe nga virusi i gripit të stinës A.
ma.me
