Rastet e gripit në vend janë shtuar, dhe sipas mjekëve piku do të jetë në fund të janarit, si edhe në muajin shkurt. Ndërkohë rastet me Covid në vend janë të pakta, ndërsa shqetësim ka në Europë dhe SHBA pas hapjes së Kinës, infektimeve dhe vdekjeve atje, por edhe për shkak të mos dhënies së informacionit real nga vendi aziatik ku e pati origjinën edhe pandemia 3 vjet më parë.
Për këtë situatë në vend dhe Botë, por edhe shqetësimin që vjen nga Kina flasim sonte në Debat me ekspertë dhe specialiste në Shqipëri, Europë dhe SHBA.
Sipas Artan Simakut, nga Instituti i Shëndetit Publik, situata gjithsesi paraqet një trend të pritshëm, edhe pse agresiv.
“Para pandemisë çdo vit qarkullonte gripi stinor, ndërkohë gjatë periudhës pandemike, nuk pati qarkullim të gripit edhe për shkak të distancimit dhe masave të tjera, si maskat dhe karantinimi. Në stinën e aktuale, gripi do të ketë pikun në fund të janarit, pra trendi është në rritje, edhe pse qarkullimi ka filluar në muajin dhjetor, veçanërisht në moshat pediatrike”, thotë ai në “Debat”.
Pra tashmë kemi gripin e rikthyer në modelin stinor, por edhe pandeminë e COVID-19, por sipas tij ka një mbizotërim të dukshëm të gripit.
Simptomat e gripit stinor janë shumë të ngjashme me agresivitetin e COVID-19, aq sa ka shpesh herë konfuzion mes të dyjave, por Simaku jo vetëm pohon se ekziston tashmë një sistem testimi për të dy viruset, por bën një apel për vaksinimin e popullatës. “Të kryhet vaksinimi i njëkohshëm, mund të aplikohet në qendrën shëndetësore, thjesht vaksinat kryhen në krahë të ndryshme, thotë ai.
/a.r
