Parlamenti grek ka kaluar së fundmi një ligj për kthimin e emigrantëve drejt Turqisë. Ligji i miratuar me 169 vota nga 300 deputetë i hap rrugë zbatimit të plotë të marrëveshjes së arritur mes Bashkimit Evropian dhe qeverisë së Ankarasë.
Të hënën është parashikuar kthimi i valës së parë të emigrantëve drejt Turqisë. Autoritetet kanë bërë me dije se afro 500 azilkërkues do të kthehen në territorin turk, por ende nuk dihet se nga ku do të largohen ata.
Aktualisht në Greqi ndodhen të bllokuar 51 mijë emigrantë. Pjesa me e madhe janë të shpërndarë kryesisht në pesë ishuj, në portin e Pireut ku ka aktualisht mbi 5000 azilkërkues si dhe në kampin e Idomenit ku numri i refugjatëve ka arritur në 11000.
Megjithatë, në bazë të burimeve jozyrtare, emigrantët e parë pritet të largohen nga ishujt Lesbos ose Kios.
Një tjetër problem shqetësues është dëshira e vetë emigrantëve për t’u kthyer pas. Shumë prej tyre shprehen se kanë sakrifikuar çdo gjë për të mbërritur në Evropën Perëndimore dhe se nuk mund ta ndërpresin tani rrugëtimin e tyre.
