Qeveria greke ka vendosur të ngrejë një komision hetimor parlamentar rreth dyshimeve se politikanët grekë janë përfshirë në skandalin “Novartis”, duke marrë ryshfete nga prodhuesi zviceran i ilaceve.
Të hënën, do të jetë vetë kryeministri Alexis Tsipras që do të kërkojë publikisht ngritjen e një komiteti parlamentar, teksa një zyrtar i qeverisë tha për Kathimerinin, se provat e deritanishme janë të pamjaftueshme për të ngritur akuza.
Partia konservatore e “Demokracia së Re” tha se do të mbështeste një hetim parlamentar, por “pa dëshmitarë nën maska”, duke iu referuar dëshmitarëve të mbrojtur nga prokuroria mbi të cilët është ngritur dyshimi rreth 10 politikanëve të përfshirë në skandal.
Lidhur me ta, komisioneri Europian për Migracionin, Dimitris Avramopulos e cilësoi fshehjen e tyre si “komplot” dhe “shpifje” duke paralajmëruar se do t’i kërkonte Gjykatës Supreme t’u heqë statusin e mbrojtjes këtyre dëshmitarëve dhe të zbulojë identitetin e tyre.
Avramopulos kontestoi ligjshmërinë e deklaratave të dëshmitarëve.
Por kryeprokurori i deparatamentit kundër korrupsionit, Eleni Touloupaki, si dhe prokurorët Christos Dzouras dhe Stelios Manolis, thanë në një deklaratë e përbashkët se dëshmitarët ishin vendosur nën status të mbrojtur në përputhje të plotë me ligjin.
Ata gjithashtu mohuan njoftimet se ata morën pjesë në një takim me zyrtarë qeveritarë për rastin Novartis.
2 ish-kryeministra dhe 8 ish- ministra dyshohet se janë përfshirë në një aferë korruptive për ndryshimin e çmimeve të medikamenteve të firmës zviceriane Novartis.
Lista me emrat që dyshohet se janë përfshirë është dërguar nga Prokuroria e Korrupsionit.
Hetimi është përqëndruar për periudhën 2006-2015, teksa dyshohet se abuzimi i ka shkaktuar shteti grekë një dëm prej 2 miliardë euro.
