Dalin detaje të tjera nga grabitja e ndodhur mëngjesin e sotëm në Gjirokastër, ku një çifti të moshuar i hynë në banesë, i dhunuan dhe iu morën paratë me të cilën do të paguanin qiranë e shtëpisë.
Gruaja e moshuar ka folur për mediat dhe ka thënë se gati sa nuk e kanë mbytur.
“Morën 187 mijë lekë edhe peshoren që punoj te tregu, shes lakra. Mori lekët dhe erdhi te dollapi dhe më zuri në fyt fort. Unë e shtyva pandeha se ishte burri. Sa u ngrit ky iku. Me zor po rri në këmbë”, tregon e moshuara.
Ajo thotë se autori iu mori lekët e qirasë që kishte mbledhur duke shitur lakra dhe se tani nuk kanë me se të paguajnë.
Ngjarja u shënua në orët e para të mëngjesit të ditës së sotme, në lagjen “Kodra e shtufit”, në banesën e Laze Shehut, 80 vjeç.
Në katin e parë të një pallati, ka hyrë nga dritarja e tualetit një person dhe ka vjedhur 18.700 lekë të reja.
I dyshuari, kur ka hyrë në banesë është pikasur nga të zotët e banesës, të cilët kanë tentuar ta ndalojnë, por kanë hasur në goditjet e tij.
Nga hetimet intensive u bë e mundur zbardhja e ngjarjes, identifikimi i autorit, kapja dhe shoqërimi i tij në ambientet e Komisariatit të Policisë Gjirokastër.
Në përfundim të veprimeve të para hetimore të kryera u bë ndalimi i shtetasit Vasil Kafarani, 32 vjeç, banues në lagjen “18 Shtatori”.
Ndaj të dyshuarit materialet iu referuan Prokurorisë së Gjirokastrës, për veprime të mëtejshme.
/a.r
