DETAJET E REJA/ Grupi hetimor vijon me intensitet veprimet për zbardhjen e grabitjes spektakolare të ndodhur në aeroportin e Rinasit, ku dyshohet se janë vjedhur rreth 3 milion euro.
Paratë po transportoheshin drejt avionit që do t’i transferonte ato jashtë vendit, por 3 persona të amskuar dhe me armë kanë arritur të marrin thasët me valutë duke kërcënuar punonjësit e sigurisë.
Paratë transportoheshin nga kompania e sigurisë “Nazeri 2000”. Kjo kompani rezulton të jetë përgjegjëse për sigurinë edhe për një pjesë të aeroportit të Rinasit, e kontraktuar nga kompania konçesionare.
“Nazeri 2000” dhe kompania ICTS ndajnë së bashku sigurinë e aeroportit.
Kjo është hera e tretë që nga kjo kompani grabiten shuma të konsiderueshme parash, me skemë thuajse të njëjtë, veçse këtë herë u thyen barrierat e sigurisë në aeroport.
Ndërkohë, hetuesit kanë zbuluar pronarin e automjetit të përdorur në këtë ngjarje, mjet që është grabitur pak kohë më parë në Berat.
………….
Një grabitje e armatosur ka ndodhur në Aeroportin e Rinasit. Persona të maskuar, nën kërcënimin e armëve kanë grabitur paratë e një banke që po trasferoheshin jashtë vendit.
Sipas policisë, grabitja ka ndodhur në pistën e avionëve në momentet kur punonjësit e një kompanie private të sigurisë po i transportonin drejt avionit.
Sipas të dhënave grabitja është kryer nga tre persona të cilët janë larguar me një mjet tip benz i cili u gjet i djegur disa kilometra larg aeroportit.
Sipas raportimeve paraprake flitet për grabitjen e një shume të konsiderueshme parash. Burimet flasin për rreth 3 milion euro, por ende nuk ka asnjë të dhënë zyrtare.
Mësohet se paratë ishin vendosur në katër thasë dhe do të transportoheshin drejt Italisë me një avion ku do udhëtonin 150 persona. Fluturimi në fjalë u ndërpre, ndërkohë raportohet se grabitësit kanë shtënë në ajër me armë për të trembur rojat e kompanisë së sigurisë.
Fatmirësisht në këtë ngjarje nuk raportohet për persona të lënduar. Ndërkohë policia ka ngritur postblloqe të shumta në zonë por nuk ka rënë në gjurmët e grabitësve. /a.m.
Njoftimi paraprak i policisë:
