Hetimi që po zhvillon Prokuroria në lidhje me grabitjen e 1 milion eurove në pistën e avionëve në Rinas, ka zbardhur detaje të reja në lidhje me ngjarjen. Një detaj i ri i ngjarjes, për të cilin ka pasur të dhëna edhe më parë, ka qenë shkaku i pranisë së Kujtim Picarit, tashmë i arrestuar, në drejtimin e furgonit të blinduar ku kanë qenë thasët me para.
“Rezulton se Kujtim Picari ka qenë punonjës për shoqërimin e vlerave monetare i bankës që po dërgonte paratë në Vjenë. Ky person nën hetim ka pranuar të marrë në dorëzim, pas skanimit të vlerave monetare, furgonin e blinduar të SHPSF ‘Nazeri 2000’, pa shoferin e firmës së mësipërme.
Ky person nën hetim, në vendqëndrimin e automjeteve të shërbimit, në kundërshtim me rregulloren, ka mbajtur të hapura dyert e mjetit, duke u dhënë mundësi autorëve të ngjarjes të futen në kasafortën e mjetit dhe të vjedhin sasinë e parave”, kanë bërë me dije burimet zyrtare të Prokurorisë.
Por hetimi i mëtejshëm ka zbardhur faktin se në momentin e mbërritjes në Rinas, furgoni i blinduar ka pasur si drejtues një shtetas tjetër. Pikërisht ky person nuk është lejuar të futet në drejtimin e mjetit brenda aeroportit, pasi nuk kishte dokument autorizimi për lëvizje me mjet brenda ambienteve të Rinasit.
Për këtë arsye, duke qenë se avioni që priste paratë kishte ndezur motorët për t’u nisur drejt Austrisë, është kryer edhe shkelja e rregullores, duke marrë drejtimin e blindit shtetasi Kujtim Picari i vetëm.
Sipas Prokurorisë, pasi ka marrë drejtimin e automjetit të blinduar ku ndodheshin thasët me euro, Kujtim Picari ka dalë në pistë dhe është afruar tek avioni që do të transportonte dërgesën financiare.
Në këtë moment ka ndodhur edhe gabimi i dytë, pasi Picari i ka mbajtur dyert e blindit të hapura në mënyrë të çuditshme, duke u krijuar kështu grabitësve lehtësi në mënyrën dhe shpejtësinë e veprimit.
PSE NDRYSHOI SHOFERI
Lënia e dyerve të hapura të mjetit të blinduar me para në pistën e avionëve, sipas Prokurorisë, është një nga momentet më të dyshimta të ngjarjes në Rinas.
Pas ndryshimit të drejtuesit të mjetit pas mbërritjes së furgonit në Rinas, Prokuroria ka verifikuar shkakun pse ka ndodhur kjo. Punonjësit e kompanisë private të sigurimit, e cila kishte transportuar paratë nga banka në Tiranë drejt Rinasit, kanë thënë para hetuesve shkakun e ndryshimit të shoferit.
Ata kanë pranuar se drejtuesi i mjetit me para duhej të kishte autorizim për hyrjen me blind në aeroport, por shoferi i furgonit atë ditë nuk e ka pasur një autorizim të tillë. Dhe kjo, sipas personave përfaqësues të kompanisë së policisë private, ka ndodhur ditën e ngjarjes për shkak të mbingarkesës.
“Stafi ynë dhe mjetet tona atë ditë kanë pasur paralelisht me dërgesën e Rinasit edhe disa lëvizje të tjera vlerash monetare ku ishin angazhuar punonjësit dhe mjetet që kemi në dispozicion. Për këtë shkak, me mjetin që shkoi në Rinas është dërguar një drejtues që nuk ishte pajisur paraprakisht me autorizim për qarkullim brenda aeroportit”, mësohet të kenë thënë dëshmitarët.
ARRESTIMET
Drejtuesi i furgonit të blinduar, Kujtim Picari, është arrestuar me urdhër të Prokurorisë për grabitjen e ndodhur më 20 qershor 2016. Ai akuzohet se ka shpërdoruar detyrën duke i lënë dyert e hapura të mjetit. Bashkë me Picarin, në pranga kanë rënë edhe dy punonjës patrulle të kompanisë së sigurimit të brendshëm të pistës së avionëve, Bledar Blloshmi dhe Fadil Jonuzaj. Në pranga kanë përfunduar me urdhër të Prokurorisë edhe shtetasit Vangjel Nikolla, Drejtor i Shërbimeve Aeroportuale, dhe Arben Karafili, shefi i stacionit të kompanisë “ICTS Albania” pranë aeroportit “Nënën Tereza”.
TRAZHGIM SOKOLAJ/Panorama/d.i.
