Përveç hetimeve intensive që policia në bashkëpunim me Prokurorinë e Krimeve të Rënda po kryejnë për identifikimin dhe kapjen e autorëve të grabitjes së parave të bankës, po hetohet edhe procedura e ndjekur nga banka dhe shkeljet e kritereve të sigurisë, disa prej të cilave duken të qëllimshme.
Burime nga Policia e Shtetit thanë dje se disa elementë të rëndësishëm sigurie nuk janë respektuar dhe përgjegjës për këtë duket se nuk janë vetëm punonjësit e policisë private që u arrestuan.
Fakti që sistemi i kamerave të sigurisë në bagazhin e mjeteve ku mbaheshin paratë ka qenë teknikisht funksional, por nuk kanë regjistruar, dëshmon se nuk janë ndezur qëllimisht raporton panorama.
Policët privatë të arrestuar deklaruan se i fikën kamerat pasi do konsumonin një kafe.
E njëjta gjë vlen edhe për aparaturat GPS që nuk kanë qenë të ndezura qëllimisht dhe i vetmi aparat gjurmimi që funksiononte mbahej në një thes bosh, që ndodhej poshtë sediljes së shoferit të njërës prej makinave.
Burime nga grupi hetimor thanë dje se këto janë detaje të sigurisë, për të cilat duhet të jenë në dijeni edhe përfaqësues të bankës që bënte transferimin e parave, pasi janë ata që sigurojnë paratë, të cilat më pas vendosen në makinën e blinduar. Për këtë arsye po hetohen edhe procedurat e ndjekura nga përfaqësuesit e bankës./a.m.
