Një 32 vjeçar nga Devolli është arrestuar nga policia në Bilisht, pasi kishte grabitur një automjet “Smart”, të parkuar në afërsi të një lokali.
Policia arriti ta kapë hajdutin falë vënies së disa pikave të kontrollit të ngritura në qytet, fill pas denoncimit që bëri pronari i automjetit.
Arbër Voci, 32 vjeçar u arrestua në zonën e Zëmblakut, në tentativë për të fshirë gjurmët e grabitjes.
Denoncimi është bërë nga pronari i automjetit, 27 vjeçari me incialet S.V.
“Arrestimi i tij u bë pas kallëzimit të bërë nga shtetasi S.V, 27 vjeç, banues në Korçë, i cili ka deklaruar se më datë 23.05.2017, në Bilisht, në afërsi të një lokali i kanë vjedhur automjetin tip “SMART” me targa AA 138 PG, në pronësi të tij.
Pas marrjes të këtij njoftimi, shërbimet e Policisë koordinuan veprimet e tyre, me qëllim që të bëhej i mundur identifikimi dhe kapja e autorit.
Konkretisht, në Zëmblak, në pikën e kontrollit të ngritur nga ana e strukturave të DVP-Korçë, u bë i mundur ndalimi i mjetit të lartpërmendur, kapja dhe arrestimi në flagrancë i autorit të dyshuar të ngjarjes.
Materialet i kaluan Prokurorisë të Rrethit Gjyqësor Korçë për veprën penale : “Vjedhja” parashikuar nga neni 134/1 i Kodit Penal.”- njofton policia./a.m.
