Një person ka tentuar të vjedhë një banesë këtë të martë në Bulqizë dhe në përpjekje e sipër nuk ka hezituar të përdorë dhunë ndaj banorëve.
Ngjarja ka ndodhur në fshatin Viçisht, ku agresori ka hyrë në shtëpinë e shtetasit I.Xh, 74 vjeç dhe ka ushtruar dhunë me mjete të forta ndaj tij dhe bashkëshortes, shtetases N.Xh.
I ndodhur në këto kushte, i zoti i shtëpisë ka marrë një armë zjarri, automatike dhe ka qëlluar ndaj grabitësit, pa i shkaktuar pasoja, shkraun TCH. Ky i fundit më pas është larguar nga banesa, ku ka arritur të vjedhë vetëm një aparat celular.
Me të marrë njoftimin, në vendin e ngjarjes kanë shkuar forcat e policisë, të cilat kanë sekuestruar armën e zjarrit që 74-vjeçari mbante pa leje dhe gëzhojat.
Si pasojë e dhunës së pësuar, ai ka marrë disa dëmtime në trup dhe ndodhet në spitalin e Bulqizës, jashtë rrezikut për jetën. Ndërkohë janë ngritur postoblloqe dhe po kontrollohet zona për të bërë të mundur identifikimin dhe kapjen e autorit./a.m.
