Versionet e sistemit operativ Android të Google-it janë emërtuar deri tani me emra ëmbëlsirash sipas një rendi alfabetik, duke filluar nga Android 1.5 Cupcake, Donut (Android 1.6), Eclair (2.0), Froyo (2.2), Gingerbread (2.3), Honeycomb (3.0), Ice Cream Sandwich (4.0), Jelly Bean (4.1), KitKat (4.4), Lollipop (5.0), dhe i fundit është Marshmallow (6.0). Përjashtim bëjnë dy variantet e para të Android-it, 1.0 dhe 1.1
Edhe pse versioni i fundit Android 6.0 Marshmallow është instaluar në vetëm 0.5% të pajisjeve Android, që tani kanë filluar spekulimet se si do të emërtohet versioni i ardhshëm i Android-it.
Nëse Google do të vazhdojë të ndjekë rendin alfabetik, atëherë sistemi i ardhshëm i Android-it do të ketë shkronjën N. Gjatë një sesioni Pyetje dhe Përgjigje në Universitetin e Delhit, shefi ekzekutiv i Google-it, Sundar Pichai, deklaroi se emri i ri i Android-it do të zgjidhet nëpërmjet një sondazhi në internet, ku do të jenë njerëzit ata që do të vendosin për të.
Në takimin me studentët indianë, një person e pyeti z. Pichai se “përse nuk kanë përdorur ëmbëlsirat indiane si emërtime për sistemin operativ Android, si ‘N’ për Naan-Khatai, ‘N’ për Neyyapam, ose ndoshta ‘P’ për Pera?
“Ndoshta për Android N do të bëjmë një sondazh në internet për emrat, dhe, nëse të gjithë indianët do të votonin, kjo mund të ndodhë”, ka bërë shaka Pichai.
