Elis Bakaj po kalon një moment mjaft të mirë në Kategorinë Superiore, pasi është bërë pjesë e Vllaznisë në merkaton e janarit. Në tri javë që janë zhvilluar deri më tani, mesfushori ka arritur të shënojë tre gola, duke dhënë garanci për ekipin e drejtuar nga skuadra e Cungut. Dje, në sfidën ndaj Korabit, Bakaj realizoi një supergol, duke e ndalur topin në trekëndësh dhe hequr mundësinë portierit kundërshtar që të reagonte.
Në një prononcim për “Panorama Sport”, pas ndeshjes, mesfushori me tipare sulmuesi është shprehur: “Sot (dje) kemi marrë tri pikë, që do t’i shërbejnë shumë Vllaznisë për pozitat që ka në tabelën e klasifikimit. E dinim që kundërshtari, edhe pse është në fund të tabelës, do të bënte maksimumin për të marrë pikë dhe realisht na ka rezultuar një ndeshje më e vështirë nga çfarë e prisnim. Megjithatë ia arritëm të merrnim trepikëshin dhe kjo ka më shumë rëndësi në këto momente”, është shprehur Bakaj, i cili thekson se kundërshtarët e kuqebluve luanin përballë njëri-tjetrit dhe për këtë arsye hapi fals për Vllazninë ishte i ndaluar.
Goli – Edhe pse në kampin shkodran është njeriu i momentit, Bakaj tregohet modest ne ato që thotë. “Nuk dua të flas shumë për golin, pasi më shumë rëndësi kanë gjithmonë pikët që merr Vllaznia dhe arritja e objektivave që ajo ka në klasifikim. Realisht nuk ka shumë rëndësi nëse shënon Bakaj apo dikush tjetër, pasi luftojmë të gjithë për një qëllim”, ka mbyllur mesfushori, që ka firmosur një kontratë deri në fund të sezonit me skuadrën e drejtuar nga Armando Cungu me opsion rinovimi edhe për sezonin e ardhshëm./a.k
