Pas ndërhyrjes në Lazarat, Edi Rama goditi përsëri krimin në 2016, duke shkatërruar më shumë se dy milionë bimë kanabis, ndërsa në vitin 2018 qeveria synon zhdukjen e fenomenit.
Kësaj situate i referohet Gazeta Britanike “The Times” në një artikull mbi prodhimin dhe trafikimin e kanabisit nga Shqipëria, për të cilin shkruan se lindi pas daljes së vendit nga sistemi komunist.
“Pas marrjes së detyrës në vitin 2013, zoti Rama dërgoi atje (në Lazarat) policinë, e cila kapi 71 ton drogë në fshat dhe më shumë se 400 armë automatike, një mitraloz anti-avion, granatë-hedhës, mortaja dhe armë anti-tank. Në përgjigje, trafikantët punësuan një ushtri fermerësh për të përhapur kultivimin në të gjithë vendin, duke i dhënë ryshfet policisë lokale. Me rritjen e fluturimeve mbikëqyrëse të policisë italiane, zoti Rama goditi përsëri, duke shkatërruar më shumë se dy milionë bimë në vitin 2016. Qeveria tha se vetëm 58 plantacione janë vërejtur vitin e kaluar (2017), nga më shumë se 2,000 një vit përpara. Është inkurajuese që fermerët të rritin bimët mjekësore në vend”-shkruan The Times.
Në artikull përmendet letra që Rama u dërgoi në nëntor krerëve të BE, duke kërkuar bashkëpunim në kapjen e kriminelëve shqiptarë në Europë. Kryeministri citohet edhe për punën që po kryhet në kapjen e kriminelëve në vendet europiane.
“Ky është një debat i madh që kam pasur me Boris Johnson, kriminelët shqiptarë nuk janë barra dhe problemi i Shqipërisë nëse rriten dhe nëse janë aktivë në vendet e tjera. Sigurisht që ka një mënyrë për të trajtuar këtë problem së bashku, sepse ata kanë lidhje dhe familje këtu (…) Ne po bëjmë arrestime, por të nesërmen ata lirohen, tha zoti Rama, duke shtuar se jane duke u forcuar kontrollet e pasurisë për gjyqtarët e dyshuar si të paguar nga mafia”.
Gazeta vlerëson se bashkëpunimi i Shqipërisë me policinë britanike është në proces. Vitin e kaluar sipas saj, një përpjekje e përbashkët ndaloi një skemë për të ndarë kallashnikovët në tri pjesë dhe t’i vendosnin ato në pjesë të veçanta, nga Tirana për te shqiptarë që prisnin në Mbretërinë e Bashkuar.
The Times shkruan se në tryezën e tij, ministri i brendshëm shqiptar Fatmir Xhafaj, ka një listë prej rreth 50 kriminelëve kryesorë, 20 prej të cilëve veprojnë jashtë shtetit.
“Ne jemi duke kontrolluar taksat, pronat dhe bizneset. Ne do t’i kapim ata, duke ndjekur paratë”, citohet Ministri Xhafaj.
Më tej gazetari udhëton në një nga pesë qendrat e magazinimit rreth Tiranës, të cilat së bashku mbajnë 100 ton lëndë narkotike, si prova e suksesit të policisë shqiptare. /http://Lexo.al
