Pas rrëzimit të kërkesës së tij për të shkrirë parlamentin nga ana e Presidentit të Islandës, Kryeministri vendit Sigmundur Gunnlaugsson ka vendosur që të japë dorëheqjen. Postin e kryeministrit do ta mbajë ministri i Agrikulturës, sipas raportimeve të mediave të ajteshme.
Prej dy ditësh tashmë në Islandë mijëra qytetarë janë ngritur në protesta, duke kërkuar largimin e Sigmundur Gunnlaugsson.
Kjo pas dokumentave të publikuara nga Panama Papers, ku tregohej se gruaja e kryeministrit, së bashku me të, kishin një kompani offshore.
Sigmundur Gunnlaugsson akuzohet se ka fshehur miliona dollarë përmes një kompanie që ai dhe gruaja zotëronin. Dokumentat për të janë pjesë e informacioneve të rrjedhura nga firma ligjore panameze Mossack Fonseca.
Sipas “letrave të Panamasë”, të rrjedhura prej “Mossack Fonseca”, Gunnlaugsson dhe bashkëshortja e tij e blenë kompaninë “Wintris” në vitin 2007. Megjithatë, kur ai u bë pjesë e Parlamentit në vitin 2009 nuk deklaroi interesat e tij në këtë kompani. Ai shiti 50% të aksioneve të tij te kompania “Wintris” te bashkëshortja, Anna Sigurlaug Palsdottir, vetëm 8 muaj më pas dhe në vlerën e një dollari. Sipas kryeministrit islandez, asnjë ligj nuk është shkelur me këtë veprim, ndërsa bashkëshortja e tij nuk ka përfituar financiarisht.
