Një tjetër incident elektoral është regjistruar ditën e sotme në Delvinë. Djali i kryetarit të PDIU-së në këtë qytet është goditur me Levë. 16-vjeçari i dëmtuar Igli Mehmeti, është djali i Ilir Mehmetit.
Ndërkohë, policia e Delvinës ka shoqëruar në komisariat autorin Kreshnik Alinani 45-vjeç. Sipas policisë, dyshohet se shkak për konfliktin është bërë mbështetja e Ilir Mehmetit për koalicionin ASHE.
PDIU reagon kundër aktit në Delvinë
Partia Drejtësi, Integrim dhe Unitet dënon me ashpërsi ngjarjen e shëmtuar, që ndodhi gjatë pasdites së të shtunës në Delvinë, ku një i afërm i kandidatit të Partisë Demokratike dhunoi djalin 16-vjeçar të kryetarit të PDIU-së në këtë qytet.
PDIU i bën thirrje prokurorisë të kryejë veprimet e domosdoshme dhe të vendosë sa më shpejt para drejtësisë autorin e ngjarjes. PDIU i bën gjithashtu thirrje Partisë Demokratike, që të tërheqë sa më shpejt elementët e rrezikshëm nga procesi zgjedhor, si dhe të ruajë qetësinë për të zhvilluar zgjedhje siç u ka hije qytetarëve tanë.
Kandidati i PD-së në Delvinë, Dhurim Alinani, nuk duhet të harrojë se ka fituar dy mandate radhazi në postin e kryetarit të Bashkisë, vetëm në sajë të mbështetjes së PDIU-së. Humbja e sigurtë në zgjedhjet e 21 qershorit nuk përligj këto akte të shëmtuara. Alinani do të përballet me ndëshkimin e qytetarëve më 21 qershor, por edhe me drejtësinë.
PDIU u bën thirrje të gjithë qytetarëve shqiptarë, që të ruajnë qetësinë dhe të shprehin me votë përbuzjen për akte të tilla dhune.
