Ka nisur seanca në Komisionin e Pavarur të Apelimit, për gjyqtarin Artur Malaj, kandidatit për Inspektor të Lartë të Drejtësisë.
Malaj është i pranishëm në këtë sallë, pas mungesës së tij në seancën e kaluar për shkak të gjendjes jo të mirë shëndetësore. Mësohet se Malaj ka hedhur dyshime për raportin e Komisionerit Publik, sipas së cilit janë shtuar shpenzime që nuk i ka bërë kurrë në jetë.
“Nuk kam asnjë shqetësim për analizën financiare që ka bërë Komisioneri Publik, por ata kanë shkelur ligjin pasi ata kanë bërë analizë për të gjitha vitet. Unë jo vetëm s’kam diferenca negative, por e kundërta! Kam bilance pozitive të të ardhurave dhe shpenzimeve. Jam i zhgënjyer nga analiza e komisionerit publik. Ajo është analizë me sensacion të paqenë. Edhe sikur të isha pa punë e të ardhura, s’do ishte një diferencë e madhe siç pretendojnë këta. Më keni shtuar shpenzimet që unë kurrë në jetë s’i kam bërë. Keni hequr të ardhurat e ligjshme të bashkëshortes sime si notere. Kjo është e qëllimshme”, mësohet të ketë thënë Malaj.
Malaj u konfirmua disa muaj më parë nga shkalla e parë e vettingut, ndërsa Komisioneri Publik kërkon shkarkimin e tij.
/a.r
