Edhe pse më herët e kishin thënë prerë se do ta miratonin nismën për shfuqizimin e Gjykatës Speciale në rast se çdo gjë do të funksiononte në mënyrë kushtetuese, Presidenti Thaçi dhe Kryeministri Haradinaj, duket se janë distancuar disi nga pozicionin e tyre paraprake.
Si Kreu i Shtetit ashtu edhe ai i Ekzekutivit duket se janë ndërgjegjësuar pas paralajmërimeve të ndërkombëtarëve, ndërsa përmes deklaratave të bëra së fundmi, kanë lënë të kuptohet se institucioni i pavarur gjyqsor do të vijojë të mbetet në fuqi.
Presidenti Thaçi gjatë një diskutimi me gazetarët në prag të 10-vjetorit të pavarësisë, ndonëse e cilësoi si diçka që duhet gëlltitur për hir të partnertetit me perëndimin, shtoi se Gjykata Speciale nuk mund të zhbëhet.
Thaçi: Dilemat kanë qenë të hequra edhe më herët dhe nuk ka pasur asnjë dilemë. Zhurmat kanë qenë të panevojshme dhe ekzagjerime të panevojshme prej kujtdo që janë bërë. Sepse Kuvendi i Republikës së Kosovës ka marrë vendim të qartë, të prerë dhe të pastër në gusht të vitit 2015 që Kosova ka pranuar – edhe pse në një rrethanë mere ose lerë – ta themelojë gjykatën dhe ai vendim është në fuqi. Unë respektoj opinionet e çdo deputeti, opinionet e secilit, por nuk ka qenë një situatë çfare është menduar dhe është prezantuar në opinion.Sot kam dhënë qëndrimin e shtetit të Kosovës në atë se shteti i Kosovës qëndron pas vendimit të gushtit të vitit 2015; se gjykata nuk do të shfuqizohet dhe Kosova këtë rrethanë duhet ta shndërrojë në avantazh dhe jo në një situatë preokupuese me tendenca destabilizimi.
Nga ana tjetër, edhe Haradinaj premtoi se Kosova do t’i përmbush të gjitha obligimet ndërkombëtare, përfshirë edhe Gjykatën Speciale, ndërsa shtoi se nuk i frikësohet kësaj të fundit.
Deklaratat e tij erdhën gjatë një interviste përballë gazetarit të mirënjohur Tim Sebastian.
Haradinaj: Kosova i ka përmbushur obligimet e saj, sa i përket ligjeve kombëtare dhe ndërkombëtare. Nuk ka dyshim që Kosova do t’i kryejë edhe këto obligime ndërkombëtare.Është një shqetësim që lidhet me Gjykatën Speciale dhe një numër të njerëzve këtu e konsiderojnë si të padrejtë ngaqë ka qasje selektive dhe etnike ndaj krimeve. Kjo gjykatë fokusohet në raste të veçanta të luftës, kështu që supozohet që ti drejtohet vetëm një etnie. Por Gjykata ekziston, është krijuar me votë në Parlament, janë votuar ndryshimet kushtetuese.
Pavarësisht tërheqjes në dukje nga nisma, ende një grup i gjerë i politikanëve të Kosovës e cilësojnë Gjykatën Speciale një institucion që dëmton imazhin e luftës së ndershme të UÇK-së për liri dhe pavarësi.
a.ç
