Gjykatësit e Apelit në Gjykatën Ndërkombëtare Penale (ICC) hodhën poshtë këtë të hënë, një nga sfidat ligjore të paraqitura nga Izraeli kundër hetimit mbi veprimet e tij gjatë luftës në Gaza.
Siç shkruan Reuters, në apel, gjykatësit refuzuan të përmbysin vendimin e një gjykate të nivelit më të ulët, sipas të cilit hetimi i prokurorisë për krime të dyshuara nën juridiksionin e saj mund të përfshijë ngjarjet pas sulmit vdekjeprurës ndaj Izraelit nga grupi militant palestinez Hamas më 7 tetor 2023.
Vendimi nënkupton se hetimi vazhdon dhe urdhër-arrestet e lëshuara vitin e kaluar për kryeministrin izraelit Benjamin Netanyahu dhe ish-ministrin e mbrojtjes Yoav Gallant mbeten në fuqi.
Sjellim ndërmend se Izraeli refuzon juridiksionin e gjykatës me seli në Hagë dhe mohon krimet e luftës në Gaza, ku ka zhvilluar një fushatë ushtarake që thotë se synon eliminimin e Hamasit pas sulmeve të 7 tetorit.
Fillimisht ICC kishte lëshuar një urdhër-arrest edhe për liderin e Hamasit, Ibrahim al-Masri, për krime lufte dhe krime kundër njerëzimit, por më vonë e tërhoqi pas raporteve të besueshme për vdekjen e tij.
Një marrëveshje armëpushimi hyri në fuqi më 10 tetor, por lufta shkatërroi pjesën më të madhe të infrastrukturës së Gazës dhe kushtet e jetesës mbeten ende të rënda.
Sipas zyrtarëve të shëndetësisë në Gaza, të dhënat e të cilëve citohen shpesh nga Kombet e Bashkuara, rreth 67 mijë palestinezë janë vrarë nga Izraeli në Gaza.
Ky vendim fokusohet vetëm në një nga sfidat ligjore të Izraelit kundër hetimeve të ICC-së dhe urdhër-arresteve për zyrtarët e saj. Nuk ka një afat kohor se kur gjykata do të vendosë për sfidat e tjera ndaj juridiksionit të saj në këtë rast.
