Një gjykatë në qytetin e Ferizajt në Kosovë, i shqiptoi masën e paraburgimit prej 40 ditësh shtetasit shqiptar Gëzim Çelaj, i cili u arrestua një ditë më parë në bazë të një urdhër arresti të lëshuar nga autoritetet e Shqipërisë nën dyshimet për përfshirje në trafikim narkotikësh dhe mbajtje pa leje të armëve dhe municioneve.
Gëzim Çelaj u arrestua në fshatin Dardani të komunës së Ferizajt në një operacion të bashkërenduar ndërmjet policisë së Kosovës dhe asaj të Shqipërisë.
Policia e Kosovës tha se i dyshuari në momentin e arrestimit ishte në shoqëri me dy gra shtetase të Shqipërisë dhe një burri nga Kosova që dyshohet se e kishte strehuar të kërkuarin për një kohë në shtëpinë e tij në një fshat të Vitisë, në Kosovën lindore.
Policia shqiptare tha ndërkaq se arrestimi u krye në kuadër të një operacioni policor ndërkombëtar me emrin e koduar “Fundi i trishtë”, në të cilin ishin përfshirë edhe agjencitë ligjzbatuese të vendeve partnerë strategjikë.
Policia shqiptarë tha se “Gëzim Çelaj (Çela), 55 vjeç, është i lindur dhe banues në Krujë. Ky shtetas ishte shpallur në kërkim, pasi Gjykata e Shkallës së Parë për Korrupsionin dhe Krimin e Organizuar, Tiranë, i ka caktuar masën e sigurisë “Arrest në burg”, për veprat penale “Trafikimi i narkotikëve”, kryer në bashkëpunim, në kuadër të grupit të strukturuar kriminal dhe “Kryerja e veprave penale nga organizata kriminale dhe grupi i strukturuar kriminal”, thuhet në një njoftim.
Policia shqiptare tha se 55 vjeçari ishte shpallur në kërkim ndërkombëtar edhe nga Italia “pasi në vitin 2012, autoritetet gjyqësore italiane e kanë dënuar me 19 vjet, 9 muaj e 29 ditë burgim, për kryerjen e veprave penale “Organizator i migrimit ilegal” dhe “Organizatë kriminale për shfrytëzim prostitucioni”./m.j