Ish-ministri i Mjedisit, Lefter Koka, i cili aktualisht gjendet në paraburgim si person i përfshirë në çështjen e inceneratorëve dhe nën hetim për korrupsion gjatë detyrës së tij, mund t’i lërë mjediset e institucionit nëse i nevojitet, për shkak të gjendjes së tij shëndetësore.
Është ky vendimi i marrë nga Gjykata kundër Korrupsionit dhe Krimit të Organizuar pranë Prokurorisë së Posaçme SPAK, pas kërkesave të shumta të Kokës, lidhur me trajtimin e tij mjekësor.
Vetë avokatët e ish-ministrit, kanë kërkuar prej kohësh një zbutje të masës së arrestit ndaj tij, lidhur me akuzat për inceneratorin e Fierit.
Mirëpo, Gjykata, nuk i ka marrë parasysh këto kërkesa deri tani.
Teksa, një tjetër i përfshirë në çështje, ish-sekretari i Përgjithshëm i kësaj ministrie, Alqi Bllako, e fitoi fillimisht zbutjen e masës në arrest shtëpie, por më pas GJKKO rivendosi masën e arrestit me burg ndaj tij.
Koka ishte i pari që u arrestua me urdhër të Prokurorisë së Posaçme (SPAK) më 14 dhjetor, për korrupsion dhe shpërdorim detyre për inceneratorët.
Në dëshminë e tij, gjatë seancës, ish-ministri theksoi se “nuk e kam shkelur ligjin”.
Arrestimi ka ardhur, pasi u kallëzua penalisht nga Lëvizja Socialiste për Integrim për çështjen e inceneratorëve.
Akuza e LSI-së lidhej me pretendimet për shkelje në ndërtimin e inceneratorit të Fierit.
Gjashtë ishin arsyet e aktit të ndërmarrë nga LSI-ja.
E para lidhet me emërtimin e procedurës.
Sipas kryetares së kësaj partie, Monika Kryemadhi, ajo është publikuar si “Tender Kombëtar”, kur realisht duhej të ishte “Tender i hapur ndërkombëtar”.
Së dyti, sipas saj, ka ndryshuar vendi ku do të ndërtohej inceneratori.
Së treti, pas firmosjes së kontratës, ka ndryshuar një nga anëtarët e bashkimit të shoqërive, sipas pretendimeve nga LSI.
Arsyeja e katërt lidhej me afatin e zgjatur të punimeve. E pesta me publikimin e procedurës dhe e gjashta me zhvendosjen – e pretenduar e jashtëligjshme – e inceneratorit.
Lefter Koka fitoi mandatin e deputetit më 25 prill në Qarkun e Durrësit.
Mirëpo, më 1 shtator 2021, vetëm dhjetë ditë përpara fillimit të punimeve të Kuvendit të ri, Koka dha dorëheqjen nga posti nëpërmjet një statusi në median sociale Facebook.
Karriera e tij politike ka nisur qysh në fillimvitet 2000.
Ai ka qenë kryetar i Bashkisë Durrës fillimisht, në mandatin 2003-2007.
Më pas, Koka, pjesë e LSI-së, do të bëhej ministër i Mjedisit në vitin 2013, në Qeverinë e parë të Edi Ramës, i cili bashkoi forcat me Ilir Metën, asokohe në një koalicion të gjerë parlamentar.
Në shtator 2017, Koka do të merrte postin e deputetit nën siglën e LSI-së, por këtë herë do të qëndronte në opozitë.
Në zgjedhjet e 25 prillit, pasi nuk pranoi të digjte mandatin e tij me vendim partie në vitin 2019 – duke qëndruar kështu në Parlament – Koka iu bashkua socialistëve, ku mori edhe votat për të qenë pjesë e Parlamentit si deputet i Qarkut Durrës.
Lefter Koka është një person, i cili i është afruar politikës nga bota e biznesit, duke zhvilluar një karrierë të shtrirë në dy dekada./m.j
