Armando Prenga do të mbetet në qeli deri në përfundim të hetimeve. Kështu është vendosur sot në seancën gjyqësore në Gjykatën e Lartë ku u vendos masa e sigurisë “arrest me burg”.
Në seancën e sotme, përpos pretendimeve të ish-deputetit socialist Prenga se është i pafajshëm në lidhje me ngjarjen e dhunshme në Laç, truoi gjykues e ka cilësuar si të ligjshëm arrestimin e tij duke e lënë në burg.
“Nuk mund ta paragjykojmë gjykatën, por nuk justifikohet qëndrimi i klientit tim në burg në bazë të provave. Duhet të ishte i lirë. Hetimi nuk është i drejtë, nuk është ligjor dhe është i njëanshëm”, tha avokati i Prengës pas daljes nga gjykata.
Armando Prenga akuzohet për armëmbajtje pa leje, plagosje me dashje dhe kanosje. Ditën e djeshme, Kuvendi i Shqipërisë votoi për heqjen e imunitetit të ish-deputetit Prenga duke i hapur rrugë drejtësisë të shqyrtojë akuzat ndaj tij.
Ndërkohë, Gjykata e Laçit dha sot edhe masën e sigurisë për shtetasin Gjergj Cali, i përfshirë në konfliktin e armatosur me ish-deputetin e PS-së.