Gjykata më e lartë e BE-së ka vendosur që martesat mes të njëjtës gjini duhet të respektohen në të gjithë bllokun dhe ka qortuar Poloninë për refuzimin e njohjes së një martese mes dy qytetarëve të saj që u zhvillua në Gjermani.
Siç raporton The Guardian, gjykata tha të martën se Polonia kishte gabuar duke mos e njohur martesën e çiftit kur ata u kthyen në Poloni, me arsyetimin se ligji polak nuk lejon martesën mes personave të së njëjtës gjini.
“Ky veprim cenon jo vetëm lirinë për të lëvizur dhe banuar, por edhe të drejtën themelore për respektimin e jetës private dhe familjare”, tha Gjykata e Drejtësisë së BE-së.
Në Poloninë kryesisht katolike, lufta për barazinë e LGBT+ për vite me radhë është përshkruar nga pushtetarët si një ideologji e rrezikshme e huaj. Megjithatë, qeveria aktuale po punon për një projektligj që rregullon partneritetet civile, përfshirë bashkimet mes të njëjtës gjini.
Gjykata Evropiane dha vendimin detyrues me kërkesë të një gjykate polake që po trajtonte çështjen e dy burrave që kishin kundërshtuar refuzimin për të transkriptuar certifikatën e tyre të martesës gjermane në regjistrin polak.
Çifti, që u martua në Berlin në vitin 2018, është identifikuar vetëm me inicialet e tyre në këtë çështje. Një avokat i çiftit refuzoi të komentojë mbi vendimin.
Qytetarët e BE-së kanë lirinë të lëvizin në shtete të tjera anëtare dhe të kenë “një jetë normale familjare” atje dhe pas kthimit në vendin e tyre të origjinës, tha gjykata.
“Kur ata krijojnë një jetë familjare në një shtet pritës, veçanërisht përmes martesës, ata duhet të kenë sigurinë se do të mund ta vazhdojnë atë jetë familjare pas kthimit në shtetin e tyre të origjinës”.
Gjykata tha se kjo nuk kërkon nga shtetet anëtare të lejojnë martesat mes të njëjtës gjini në ligjet e tyre kombëtare. Por ato nuk lejohen të diskriminojnë çiftet e së njëjtës gjini në mënyrën se si njohin martesat e huaja, shtoi ajo.
Kryeministri i Polonisë, Donald Tusk, dhe qeveria e tij pro-evropiane po punojnë për të çuar përpara projektligjin mbi bashkimet e së njëjtës gjini, por janë penguar nga rezistenca e partnerit të tij konservator në koalicion.
Presidenti nacionalist i Polonisë, Karol Nawrocki, ka thënë gjithashtu se do të vërë veton ndaj “çdo projektligji që do të minonte statusin e mbrojtur kushtetues të martesës”.
