Gjykata mban në sirtar aktakuzën rreth aferës “Pronto”, nuk ua jep të akuzuarve. Njëmbëdhjetë të akuzuarit në aferën “Pronto”, as pas katër muajsh, qëkur është ngritur aktakuza kundër tyre nuk kanë “njohuri” për përmbajtjen e saj. Gjykata Themelore e Prishtinës nuk ua ka dorëzuar ende atë me gjithë që avokatët mbrojtës e kanë kërkuar disa herë. Pos që nuk ua ka dhënë aktakuzën, gjykata ende nuk ka caktuar as datën për fillimin e këtij procesi gjyqësor.
Në anën tjetër, avokatët mbrojtës i kanë thënë “Kohës Ditore” se i kanë pranuar nga Prokuroria të gjitha shkresat e lëndës qysh në momentin kur është ngritur aktakuza. Por këtë të fundit Prokuroria u ka thënë që ta kërkojnë në gjykatë, pasi atje e kanë dorëzuar.
Për këtë çështje, zyrtarë nga gjykata nuk kanë dhënë ndonjë informacion. Kanë thënë se gjyqtari i rastit, Shasivar Hoti, është në pushim vjetor.
Në anën tjetër, njohës të çështjeve të drejtësisë thonë se kjo neglizhencë e gjykatës duket e qëllimshme dhe nëse vazhdon kështu, rrezikon parashkrimin e lëndës.
Një ministër, një ish-zëvendësministër, deputetë e ish-deputetë të PDK-së, këshilltarë të Kuvendit të Kosovës, si dhe zyrtarë të tjerë, janë të akuzuar në aferën “Pronto”, përgatiti Express. (b.an)
