Gjykata Administrative e Apelit rrëzon padinë e Urdhërit të Infermierit, duke e konsideruar si të ligjshëm urdhërin e Ministrisë së Shëndetësisë për testimin e infermierëve.
Vendimi u mor në seancën e sotme gjyqësore.
Me këtë vendim, Apeli legjitimon urdhërin e MSH-së, duke i hapur rrugë kështu zhvillimit të testit për infermierët.
Presidenti i Urdhërit të Infermierit e çoi çështjen në gjykatë, pasi sipas Sabri Skënderit, ky testim ishte i paligjshëm.
I kontaktuar nga Ora News pas vendimit të sotëm të gjykatës, Skënderi tha se do të pritet zbardhja e plotë e vendimit dhe pastaj mund të shikohet mundësia për ta apeluar në Gjykatën e Lartë.
Rreth një muaj më parë kjo gjykatë vendosi pezullimin e testimit, duke i lënë mundësi palëve të sjellin argumentet për realizimin dhe kundërshtimin e këtij testimi.
Nëse realizohet testimi i infermierëve, MSH do të nxjerrë udhëzimet përkatëse edhe për testimin e mjekëve.
Ndërkohë për infermierët testimi është gati.
