Mbarë vendi u trondit nga një ngjarje e rëndë ditën e sotme, ku tre pjesëtarë të një familjeje gjetën vdekjen si pasojë e rrjedhjes së bombolës së gazit dhe një tjetër ndodhet në gjendje të rëndë.
Ngjarja e rëndë u shënua në fshatin Ostren të Bulqizës, ku gjetën vdekjen nëna Rajmonda Tola, 40 vjeç, bashkë me djalin e saj Fatjonin 14 vjeç dhe vajzën Rudinën 19 vjeç.
Ndërkohë vajza tjetër Merita Tola, ndodhet në gjendje të rëndë në spital.
Dyshohet se gjithçka ka ndodhur gjatë natës teksa pjesëtarët e familjes ndodheshin në gjumë.
Por gjithçka është zbuluar paraditen e sotme rreth orës 11.30, kur kunata e Rajmondës, gjeti trupat e pajetë, kur trokiti në derën e shtëpisë dhe askush nuk iu përgjigjej.
Duke qenë se nuk po hapte dot derën, ajo ka lajmëruar fqinjët, të cilët e kanë hapur me forcë, për tu përballur me tre trupa të pajetë dhe vajzën e vogël, e cila u dërgua në spital në gjendje të rëndë.
Mësohet se kryefamiljari, Ylber Tola ndodhej në emigrim në Greqi dhe se 40-vjeçarja, kujdesej e vetme për fëmijët.
g.kosovari
