Nga Lorenc Vangjeli/ Nis beteja e spoteve negative për kundërshtarët
Me siguri dhe Lulzim Basha ka qeshur kur e ka parë veten në spotin që PS ka publikuar kundër tij. Një tip i veshur me kemishë dhe pantallona që fle në një kolltuk zyre dhe që për më tepër, gërhetnë paqen e tij. Ideja është që si kryetar i Bashkisë së Tiranës Lulzim Basha vetëm ka fjetur.
Në PD janë duke menduar kundërpërgjigjen. Eshtë duke u përgatitur një spot i ngjashëm, por me dy personazhe, edhe Ramën edhe Veliajn. Me të njëjtën tip fabule: portretizimin thellësisht negativist të kundërshtarit. Pritet që spoti të dalë në transmetim në fillm të javës.
Dy spotet rivalë do ta rrisin temperaturën e vakët të fushatës, ku ngjan se edhe akuzat që kanë nisur të ashpërsohen, nuk ndikojnë aspak në bindjet e votuesve që ngjan se kanë përgatitur një tjetër 23 qershor, të dielën e fundit të këtij qershori.
Megjithatë, gota është gjysëm plot. Në fushatat paraardhëse, sidomos në 2011-ën dhe 2013-ën, spotet negative kundër kundërshtarëve ishin shumë më të rëndë. Ndoshta të gjithë e kanë kuptuar se të shash rëndë kundërshtarin nuk do të thotë se mund të reduktosh numrin e atyre që duan atë, por vetëm forcon rradhët e atyre që e urrejnë atë. Dhe anasjelltas. I vetmi shans për të transferuar vota nga një kamp në tjetrin, është të bindësh votuesin se mund të bësh një gjë më shumë se rivali. Dhe kur thuhet i vetmi shans, kjo do të thotë se është i vetmi shans legal dhe jo sipas manualit të vjetër Ristani.
P.S., si Post Scriptum dhe jo si Partia Socialiste: Ka humbur ish-kryetari i KQZ-së.
