Ministrja e Drejtësisë, Etilda Gjonaj ka zhvilluar një takim me presidentin e Asamblesë së Përgjithshme të OKB-së, Volkan Bozkır, me të cilin diskutoi për rëndësinë e sesionit të posaçëm të kësaj Asambleje për luftën kundër korrupsionit.
Përmes një postimi në rrjetin e saj social Facebook, shkruan se gjatë takimit i ka shprehur Volkan Bozkır, rëndësinë e përfshirjes në agjendën e Kombeve të Bashkuara me prioritet luftën kundër korrupsionit, për shkak të impaktit të drejtëpërdrejtë që sjell në paqen dhe sigurinë e vendeve anëtare veçanërisht kur ndërvepron me krimin e organizuar.
“Bashkëpunimi midis shteteve konsiderohet i rëndësishëm pasi lufta kundër korrupsionit nuk është më vetëm një çështje që qëndron brenda kufijve kombëtarë.”, shkruan Gjonaj në postim.
Ministrja shprehet se gjatë takimit ajo theksoi prioritetet e Qeverisë Shqiptare për konsolidimin e shtetit ligjor, nëpërmjet reformimit të sistemit të drejtësisë ashtu si edhe në luftën kundër korrupsionit, për të cilat janë arritur rezultate domethënëse.
Ajo shtoi se presidenti Bozkır inkurajoi vijimin e zbatimit të reformave të ndërmarra, me theks të veçantë atë në drejtësi, përtej sfidave që duhet të përballojmë, me qëllim garantimin e të ardhmes së qytetarëve.
/a.r
