Avokati i Sali Berishës, Genc Gjokutaj, ka folur për mediat pasi GJKKO shtyu vendimin për masën ndaj ish-kryeministrit për në datën 30 dhjetor.
“Gjykata e shtyu për në datë 30, të shikojmë nëse do të ketë gjykuar kërkesën për përjashtimin e gjyqtares. Sot kemi marrë provat që do të shoqërojnë kërkesën. Me provat që ne mendojmë që mbështesin kërkesën për përjashtimin e Irena Gjokës. Provat tregojnë njëanshmërinë e gjyqtares”, tha Gjokutaj.
Shkak per shtyrjen e marrjes se vendimit janë bërë kërkesat e avokatëve të cilët kanë depozituar në sekretarinë e gjykatës kërkesën për prova të mëtejshme lidhur me procesin.
Situata ku tashmë, seanca për caktimin e masës ndaj Berishës është shtyrë për të tretën herë lidhet me një strategji të ndjekur nga avokatët e tij, të cilët kanë kërkuar përjashtimin e gjyqtares Irena Gjoka. Meqë tashmë e kanë marrë pjesën më të madhe të provave për njëanshmërinë e gjykimit, do të dorëzojnë kërkesën për përjashtimin e gjyqtares Irena Gjoka.
Do të jetë Rudina Palloi ajo që do të marrë vendimin përsa i takon kërkesës së tyre për përjashtimin e gjyqtares Irena Gjoka. /m.j
