Kreu i Partisë Social-Demokrate, Skënder Gjinushi thotë se e majta ka qenë e përçarë historikisht.
I ftuar në Arena nga Dritan Hila në Rtv Ora News, theksoi se çarja më e fundit midis PS-së dhe LSI-së ndodhi në gusht.
Elmaz Sherifi që drejton Partinë Lidhja për Drejtësi e Progres sqaron pse u largua nga Partia Socialiste.
Pjesë nga bisedat:
Gjinushi: E majta e ka pasur si traditë sherrin nga brenda. Kompromisi i 2013-s ishte konjuktural. Një parti kaloi me grupimin e majtë dhe opozitën e 2013-s që fitoi. Kur pyesin; a do ndahen? Unë them; a janë ngjitur ndonjëherë? Nuk kanë qenë asnjëherë të bashkuar tërësisht. Ka një qëndrim të ndryshëm për reformën në drejtësi, është e vetmja ndarje. Për programin kanë shumë pak diferencë. Përplasja e parë ishte që në gusht.
Sherifi: Portat e mendimit të lirë u mbyllën dhe kjo ishte arsyeja që u largova. Mua nuk më bën përshtypje pse ka konflikt, por pse u bashkuan. Koalicioni normal do të ishte në vitin 2009. Ky moral politik mungonte, tani është bërë i dukshëm.
Konflikti është i hapur dhe thuhet nuk ka konflikt. Sot ka ikur nga koalicioni i fillimit Partia e të Drejtave të Njeriut dhe ka ardhur një parti tjetër e djathtë. Koncepti mbi të majtat dhe të djathtat duhet ndryshuar. Duhen parë realitetet e reja politike. duhet të ndërtojmë koalicione që bazohen mbi vlera morale dhe jo bashkime ideologjike.
