Kryetari i PS në Lezhë, Ermal Pacaj, si dhe kandidat i socialistëve për deputet ka denoncuar publikisht një ngjarje të paprecedentë të ndodhur mbrëmjen e kaluar në Lezhë.
Pacaj deklaron se disa persona të armatosur, me porosi të kandidatit të PD për deputet në Lezhë, Gjin Gjoni kanë shkuar në lokalin e babait të kandidates së PS, Klotilda Ndreca, dhe kanë kërcënuar familjarët se do të merren peng.
Burime nga Policia konfirmojnë se dy persona janë shpallur në kërkim në lidhje me ngjarjen e ndodhur mbrëmjen e kaluar në Dajç të Lezhës.
Pacaj ka vazhduar me denoncimet duke thënë se Gjoni ka dalë në terren dhe po intimidon votuesit duke “përhapur akuza të pabazuara ndaj drejtuesve të PS në zona të ndryshme, përfshirë disa drejtues shtabesh, duke i akuzuar ata për blerje votash.”
Pas paraqitjes së denoncimit në DVP Lezhë, Pacaj deklaroi se PS do t’i drejtohet edhe zyrës së vëzhguesve të OSBE-së, për të informuar mbi situatën dhe për të kërkuar vëzhgim më të rreptë të fushatës.
Disa ditë më parë kandidati demokrat Gjin Gjoni është përplasur dhe me kryebashkikaun e Lëzhës, Pjerin Ndreu.
Të dy kanë hedhur akuza në drejtim të njëri-tjetrit në rrjetet sociale, ku Gjoni etiketon drejtpërdrejt Pjeriun Ndreun dhe ashpërson gjuhën, kur thotë se çdo tentativë për të devijuar vullnetin e zgjedhësve do të ketë përballë atë dhe gjithë demokratët e Lezhës.
Nga ana tjetër Pjerin Ndreu u kundërpërgjigj duke thënë se askush në Lezhë nuk ka nevojë të bëjë presione apo shantazhe, sepse lezhjanët e kanë zgjedhur vetë se kujt do t’ia besojnë votën.
