Nuk do të angazhohen totalisht për garën elektorale të 6 Marsit në 6 bashkitë, por socialistët janë të bindur se do i fitojnë ato përfshirë dhe Bashkinë e Shkodrës, një bastion që nuk mbahet mend që kur është drejtuar për herë të fundit nga një socialist.
Damian Gjiknuri, në një intervistë nuk e fsheh që kriza në PD i favorizon në këtë proces zgjedhor.
“Garimi me kandidatët e tyre do të sjellë çarje vote dhe natyrshëm kjo krijon avantazhe elektorale për PS, s’mund ta mohoj këtë. Por gjithsesi Shkodra është nga garat më të vështira, është një garë që ia vlen të fitohet se ka shumë vite që fitohet vetëm nga demokratët”.
Emrat e kandidatëve për 5 bashkitë e Durrësit, Shkodrës, Vorës, Rrogozhinës e Dibrës u zyrtarizuan të premten nga kryesia socialiste. E vetmja bashki ku ende janë duke u shqyrtuar kandidaturat është Lushnja. Edhe në këtë rast Gjiknuri nuk e fsheh që arrestimi i kryebashkiakut të Lushnjes e ka vështirësuar situatën në gjirin e PS në këtë bashki.
“Natyrshëm situata aty mbase s’ka qenë dhe aq e favorshme për shkak të edhe situatave penale që janë krijuar, megjithatë duhet parë dhe ana tjetër e medaljes që është konsultimi më i gjerë për të dalë me një kandidaturë më të mirë”.
Në këto zgjedhje të pjesshme, Gjiknuri sheh si aktor dhe Presidentin e Republikës që është rikthyer si para 25 Prillit të jetë shumë aktiv në publik.
“Frymëzimet poetike të Presidentit, sipas garës së radhës nuk dua t’i komentoj se nuk di nga se frymëzohet ai. Unë di që ai nuk e bëri rolin e Presidentit dhe për këtë do mbahet mend në histori. Ka qenë aktor i mirëfilltë politik, pjesëmarrës në çdo palë zgjedhje. Me ç’duket po përgatitet tranzicioni i tij politik. Për ne nuk është ndonjë ngjarje e paparashikuar”.
Procesi brenda Partisë Socialiste për përzgjedhjen e kandidaturave për Presidentin e ri që në çdo rast duhet të nisë zyrtarisht në Prill, mohon të ketë nisur. Por sheh dhe mekanizma sesi opozita të ketë rolin e saj në këtë përzgjedhje.
“Është pjesë e grupimeve të votave në Parlament dhe e ka mundësinë të shprehet dhe të pozicionohet sipas interesave politikë dhe në lidhje me figurat më të përshtatshme që ata i gjykojnë”.
I ngarkuar për të bërë ndryshimet në statutin e PS që do miratohen në Kongresin e Prillit, Gjiknuri zbulon për Tv Klan disa nga ndërhyrjet në librin e rregullave të kësaj force.
“Krijimi i një strukture ekzekutive administrative”.
Por a është ky mekanizëm çimentimi i sistemit të patronazhimit në PS, aq shumë të debatuar para 25 Prillit?
“Krijimin e një strukture permanente administrative në parti e cila do të jetë strukturë ekzekutive për pasjen e një skeleti të mirëfilltë të partisë”.
Kryeministri Rama ka deklaruar se në procesin e 6 Marsit do të angazhohen vetëm deputetët dhe përfaqësuesit politikë të bashkive që shkojnë në zgjedhje dhe jo e gjithë Partia Socialiste.
