Ministria e Zhvillimit Urban organizoi të martën në Tiranë, një takim me donatorë dhe përfaqësues të projekteve të huaja që operojnë në vendin tonë, me qëllim identifkimin e potencialeve për asistencë teknike dhe financiare për të ndihmuar bashkitë e krijuara mbas ndarjes së re territoriale për hartimin e Planeve të Përgjithshme Vendore Territoriale.
Ministrja e Zhvillimit Urban, Eglantina Gjermeni tha se, Shqipëria po hyn në një fazë të re zhvillimi, ku padyshim mbështetja dhe kontributi i donatorëve ka një rol të rëndësishëm në këtë zhvillim.
“Qeveria e Shqipërisë aktualisht po financon hartimin e 26 Planeve të Përgjithshme Vendore, të cilat janë duke u zhvilluar”, theksoi Gjermeni ndërsa vuri në dukje se, Projekti i USAID-it për Planifikimin dhe Qeverisjen Vendore është duke ndihmuar 5 bashki të tjera që të krijojnë planet e tyre zhvillimore.
Por ajo që parashtrojmë si çështje sot, tha Gjermeni, është fakti që deri më sot nuk janë identifikuar ende burime financimi për Planet e Përgjithshme Vendore për 30 bashkitë e tjera në Shqipëri.
Kryebashkiakut i Tiranës Erjon Veliaj, duke marrë fjalën në këtë takim u shpreh se, planet e zhvillimit të bashkive nuk duhet të shihen vetëm si leje për ndërtime, pasi në planet vendore, duhet t’i lihet vend urbanizimit dhe zhvillimit ekonomiko-social, në shërbim të komunitetit.
“Synimi i planit është të çojmë shërbimin aty ku duhet në dobi të qytetarit. Nuk mund të zhbëjmë atë që është bërë deri tani, por duhet ë rijetëzojmë zonat që sot vuajnë gabimet”, tha Veliaj.
Ai përmendi edhe disa nga arritjet e institucionit që ai drejton. “Bashkia e Tiranës ka bërë edhe dëgjesë publike për planet e Tiranës dhe do të vazhdojë ta bëjë. Ky është një proces i gjatë dhe shumë bashki do të kenë nevojë për mbështetje financiare”, deklaroi Veliaj.
