Ministrja e Zhvillimit Urban, Eglantina Gjermeni ishte sot në bashkinë Gramsh, një prej 61 njësive vendore të krijuara pas reformës territoriale. Në dy vite, me financim të Fondit të Zhvillimit të Rajoneve, në këtë bashki janë zbatuar 4 projekte me vlerë 60 milionë lekë. Projektet konstitojnë në rikonstruksionin e fasadave të pallateve dhe të sheshit qendror të qytetit, por edhe në sistemimin e hapësirës përreth Pallatit të Kulturës apo sistemimit dhe asfaltimit të disa lagjeve e shesheve.
Ministrja Gjermeni, e shoqëruar nga kryebashkiakja e Gramshit, Luljeta Dollani, pasi inspektuan projektet ka deklaruar se, këto investime ia kanë ndryshuar pamjen qytetit duke e bërë më të këndshëm për qytetarët dhe vizitorët.
“Them se Gramshi me potencialet që ka, ka më tepër mundësi për t’u zhvilluar ekonomikisht, në qoftë se vërtet investohet më shumë në infrastrukturën urbane, për ta bërë më të këndshëm qytetin. Ministria e Zhvillimit Urban dhe Fondi i Zhvillimit të Rajoneve, përmes thirrjes së fundit, do të kenë mundësi që të mbështesin bashkitë apo qytetet më të vogla, të cilat nuk janë mbështetur më parë ose janë mbështetur pak nga Rilindja Urbane, për t’i dhënë një nxitje më të mirë zhvillimit ekonomik të këtyre bashkive të reja”, – deklaroi Ministrja Gjermeni gjatë inspektimit.
Bashkia Gramsh ka aplikuar pak ditë më parë pranë FZHR për rehabilitimin e lagjes “Sporti 2”, gjendja e së cilës u pa sot nga afër nga Ministrja.
Gjatë vizitës së saj në Gramsh, Ministrja Gjermeni është takuar edhe me grupet e interesit, të cilat kanë paraqitur shqetësimet e tyre që lidhen kryesisht me infrastrukturën rrugore dhe hartimin e një plani të përgjithshëm vendor.
Gramshi, është një prej bashkive që nuk kanë ende një plan dhe sipas Ministres, do të shihen të gjitha mundësitë që ose nëpërmjet donatorëve, me të cilët Ministrja Gjermeni do të takohet në fund të muajit Mars, ose nëpërmjet buxhetit të shtetit, kjo bashki bashkë me 29 të tjera, të ketë së shpejti planin e përgjithshëm vendor.
