Komisioni për vaksina në Gjermani tha të enjten se personat që e kanë kaluar sëmundjen COVID-19, duhet të marrin vetëm një dozë të vaksinës së prodhuar nga kompania britanike, AstraZeneca dhe Universiteti i Oxford-it.
Ky vendim pritet që mundësojë që më shumë njerëz të vaksinohen kundër koronavirusit, teksa shtetet po përballen me mungesë të dozave të vaksinave.
Një dozë e AstraZenecas duhet t’i administrohet një pacienti që është diagnostikuar me COVID-19 gjashtë muaj më parë, tha Komisioni i përhershëm i vaksinave, përmes një deklarate për media.
Gjermania është përballur me një refuzim të qytetarëve për të marrë vaksinën e AstraZenecas, pasi gjatë studimeve klinike për këtë vaksinë, nuk kanë qenë të përfshirë personat mbi 65 vjeç.
Kjo ka bërë që disa udhëheqës të landeve gjermane të bëjnë thirrje që vaksina e AstraZenecas t’u jepet të rinjve.
Sipas të dhënave preliminare, Vaksina AstraZenecas është 63.9 për qind efikase kundër sëmundjes COVID-19, që e shkakton koronavirusi.
Që prej fillimit të pandemisë COVID-19, Gjermania ka regjistruar mbi 2.4 milionë raste me këtë sëmundje, thuhet në të dhënat e Universitetit Johns Hopkins.
/REL/a.r
