Nën drejtimin e kancelarit Friedrich Merz, Gjermania ka prezantuar një plan ambicioz për të forcuar forcat e saj të armatosura me një investim rekord prej 355 miliardë eurosh përgjatë 15 viteve të ardhshme.
Plani parashikon rritje graduale të shpenzimeve duke hequr kufizimin kushtetues mbi borxhin për të përshpejtuar modernizimin ushtarak.
Fokusi është përqendruar në komunikimet satelitore (13.3 mld €), sistemet e telekomunikacionit (15.9 mld €), automjetet luftarake (20.8 mld €), pajisje për trupat (20.9 mld €), rinovimin e flotës ajrore dhe raketore (34.2 mld €), anijet dhe nëndetëset (36.6 mld €), tanket dhe automjetet luftarake (52.5 mld €), si dhe një shumë të madhe prej 70.3 miliardë eurosh për artileri, mortaja, municione dhe sisteme të mbrojtjes ajrore.
InsideOver shkrun se këto shpenzime përfaqësojnë një kthesë historike në qëndrimin ushtarak të Gjermanisë dhe tregojnë synimin për të marrë më shumë përgjegjësi në mbrojtjen e Evropës.
Sipas portalit gjerman Hartpunkt, Gjermani synon të shpenzojë deri në 52 miliardë euro në vit vetëm për blerje pajisjesh ushtarake, më shumë se gjysma e shpenzimeve aktuale totale të mbrojtjes.
Kjo rritje masive është pjesë e një strategjie afatgjatë për fuqizimin e Bundeswehr-it, ku përfshihen projekte të mëdha si:
– Iniciativa Evropiane e Mburojës së Qiellit (ESSI) për një sistem mbrojtës kundërajror kontinental,
– Prodhimi i avionëve luftarakë F-35 në Gjermani për forcat ajrore (Luftwaffe),
– Projekti i tankut Panther në bashkëpunim me Italinë dhe sipërmarrjen Rheinmetall-Leonardo,
– Sistemi i ri raketor Deep Precision Strike në bashkëpunim me Britaninë.
Shpenzimet do të plotësojnë boshllëqet që nuk janë mbuluar ende nga Fondi Special i mbrojtjes prej 100 miliardë eurosh, i miratuar nga kancelari Scholz në 2022. Kjo tregon një angazhim të qartë për rritjen e rolit të Gjermanisë në sigurinë evropiane dhe globale.
Gjermania po përfshihet në një projekt afatgjatë që përfshin si ringritjen ushtarake të vendit, ashtu edhe rigjallërimin industrial duke ndërtuar një strategji ambicioze që shkon përtej shifrave të ftohta buxhetore.
Kancelari Friedrich Merz synon që dekada e viteve 2030 të jetë periudha kur Bundeswehri të rikthehet si një forcë kyçe në skenën globale, duke e vendosur Gjermaninë ndër pesë fuqitë kryesore ushtarake në botë.
Në sfond është një vizion gjeopolitik që e konsideron Evropën gjithnjë e më të ekspozuar ndaj rreziqeve, veçanërisht përballë agresionit rus dhe pasigurive në mbështetjen amerikane për sigurinë kontinentale.
Në këtë kontekst, Gjermania jo vetëm që po rrit ndjeshëm kapacitetin e saj ushtarak, por po e lidh këtë proces me industrinë vendase – duke e paraqitur riarmatosjen si një plan keynesian për të stimuluar ekonominë dhe për të përforcuar kapacitetin teknologjik e prodhues të vendit.
Topi tani kalon në fushën e ministrit të Mbrojtjes Boris Pistorius, i cili pritet të udhëheqë zbatimin e nismës më ambicioze të riarmatimit në historinë e Gjermanisë moderne.
Plani parashikon autorizime angazhimi me vlerë rreth 325 miliardë euro për periudhën 2027–2041, që do t’i lejojnë ministrisë të lidhet me kontrata shumëvjeçare për blerjen e tankeve, avionëve dhe anijeve luftarake.
Pistorius, i quajtur shpesh “skifteri” i politikës gjermane të mbrojtjes, ka qenë i qartë në kërkesën e tij ndaj industrisë që të përgatitet për këtë sfidë të madhe.
Për të përshpejtuar realizimin e programeve, ministria do të sigurojë sektorin industrial përmes kontratave të qarta dhe parashikueshmërisë financiare – faktorë kyç për një industri që ka vuajtur nga pasiguria.
Megjithatë, pengesat janë reale: nga mungesa e çelikut, tek ruajtja e fuqisë punëtore të kualifikuar dhe menaxhimi i furnizimeve e logjistikës.
