Parlamenti i Gjeorgjisë ka votuar përfundimisht ligjin për organizatat joqeveritare të cilat nëse marrin mbi 20 për qind të financimeve do të etiketohen si “agjentë të huaj”. Vota e parlamentarëve të Gjeorgjisë anashkalon kështu veton presidenciale të një ligji të frymëzuar nga Rusia, duke sfiduar protestat e ashpra brenda vendit, por edhe kritikat jashtë vendit.
Partia në pushtet, Ëndrra Gjeorgjiane, ashtu siç pritej, e përshpejtoi votimin për rrëzimin e vetos. Ajo, së bashku me partinë aleate, Partia Demokratike e Gjeorgjisë, kanë votuar me 83 vota pro, ndërsa 76 ishin kundër. “Ëndrra Gjeorgjiane” argumenton se ligji është i nevojshëm për të promovuar transparencën dhe për t’i rezistuar “vlerave pseudo-liberale” të nxitura nga të huajt, por kritikët e saj kanë thënë se mund të shkatërrojë përpjekjen e vendit për t’u bashkuar me Bashkimin Evropian dhe ta kthejë atë në orbitën e Kremlinit.
“Bashkimi Evropian shpreh keqardhje të thellë që Parlamenti Gjeorgjian vendosi të anashkalojë veton e Presidentes”, tha unioni në një deklaratë, duke thënë se ligji “shkon kundër parimeve dhe vlerave thelbësore të BE-së”.
Nga ana e tyre, Shtetet e Bashkuara kanë kritikuar gjerësisht këtë manovër të partisë “Ëndrra gjeorgjiane”, duke e dënuar atë. Zëdhënësi i Departamentit të Shtetit, Mike Miller, kërcënoi me ndalim vizash dhe me sanksione për zyrtarët e lartë.
Mosmarrëveshja rreth projektligjit është parë si një provë kyçe nëse Gjeorgjia, për tre dekada në mesin e shteteve më properëndimore të pasardhësve të Bashkimit Sovjetik, do të ruante orientimin e saj perëndimor, ose do të kthehej në vend të Rusisë. Rusia është e papëlqyeshme në mesin e shumë gjeorgjianëve për mbështetjen e saj ndaj rajoneve të shkëputura të Abkhazisë dhe Osetisë së Jugut, ndërsa opinioni publik mbështet gjerësisht anëtarësimin në BE dhe NATO.
/a.r
