Forcat irakiane kanë njoftuar se kanë gjetur 19 varreza të përbashkëta, në të cilat gjenden trupat e 365 luftëtarëve të grupit xhihadist “Shteti Islam” (ISIS) në qytetit Baiji, në veri të Bagdadit. Një zyrtar i ushtrisë ka konfirmuar gjetjen e një numri të madh të trupave të xhihadistëve në varreza të përbashkëta por pa qenë në gjendje të japë numrin e saktë, përcjell “zeri.info” informacionin e publikuar nga mediet ndërkombëtare.
“Njësitë e Mobilizimit Popullor kanë gjetur në lagjen Asri gjithsej 19 varreza massive, në të cilat gjenden trupat e 365 terroristëve të DAESH-it (akronimi në arabisht për ISIS)”, thekson një komunikatë e forcave të sigurisë.
Nuk është e qartë prej kur këta trupa janë varrosur aty as se si forcat e sigurisë kanë mundur t’i identifikojnë. Njësitë e Mobilizimit Popullor, forca paramilitare të dominuara nga shiitët e mbështetur nga Irani, i kanë ndihmuar forcat irakiane që ta rikthejnë nën kontroll qytetin Baiji dhe rrethinën e tij.
