Eshtrat e gjetura në një zonë kodrinore-malore të Novobërdës dyshohet se i përkasin biznesmenit Bedri Rexhepi, i cili rezulton i zhdukur prej prillit të vitit të kaluar.
Sipas Prokurorisë Themelore në Prishtinë, mbetjet kockore do t’i nënshtrohen ekzaminimeve të nevojshme për të zbuluar nëse viktima është biznesmeni.
“Gjatë verifikimit të terrenit është arritur të identifikohet një lokacion i dyshimtë me të cilën pas gjurmimit nga njësitë përgjegjëse janë gjetur mbetje mortore (të dekompozuara), të cilat dyshohen se kanë të bëjnë me rastin e “Rrëmbimit” të B.R.”, njoftoi Prokuroria.
Reagimi i plotë:
Prokuroria Themelore në Prishtinë, njofton opinion publik se në koordinim të plotë me Policinë e Kosovës, konkretisht Njësinë e Hetimeve të Përgjithshme në Prishtinë dhe institucionet e tjera relevante, në vazhdën e hetimeve, janë siguruar prova shtesë lidhur me rastin e “Rrëmbimit” të B.R., me ç’ rast është planifikuar që veprimet hetimore të bëhen edhe në terren me qëllim të identifikimit të lokacionit për gjetjen e personit në fjalë.
Gjatë ditës së sotme, prokurori i rastit së bashku me njësitë policore përgjegjëse, Institutin e Mjekësisë Ligjore (IML) dhe Forcën e Sigurisë së Kosovës (FSK), kanë dalë në një zonë kodrinore-malore të Novobërdës dhe gjatë verifikimit të terrenit është arritur të identifikohet një lokacion i dyshimtë me të cilën pas gjurmimit nga njësitë përgjegjëse janë gjetur mbetje mortore (të dekompozuara), të cilat dyshohen se kanë të bëjnë me rastin e “Rrëmbimit” dhe të njëjtat do t’i nënshtrohen ekzaminimeve të nevojshme për të konstatuar identitetin e këtyre mbetjeve mortore.
Prokurori i Shtetit në koordinim të plotë me Policinë e Kosovës dhe institucionet e tjera relevante janë duke vazhduar me ndërmarrjen e veprimeve hetimore, andaj lidhur me zhvillimet e tjera rreth këtij rasti do t’iu mbajmë të informuar.
Zhdukja e Bedri Rexhepit
Për herë të fundit, ai është parë në Novobërde në datën 8 prill 2021. Dyshohet se ai është rrëmbyer nga Jeton Vllasaliu, i cili ka qenë klient i Bedri Rexhepit.
Në pranga ka rënë edhe Arjeta Rukovci, që dyshohet se ka ndihmuar në rrëmbimin e biznesmenit.
Ajo u arrestua për veprën penale “Ndihmë” në kryerjen e veprës penale “Rrëmbimi”, njoftoi policia e Kosovës.
Vetura e biznesmenit e tipit “Grand Shirok” është gjetur në arat e fshatit Janjevë të Lipjanit vetëm një ditë pasi familjarët humbën kontaktet me të.
/e.d
