“Masa më e shpejtë është ngrirja e statusit kandidat në BE për Serbinë”. Kështu ka deklaruar ministrja e Jashtme e Kosovës Donika Gërvalla pas një takimi që pati me homologen gjermane Annalena Baerbock në Tiranë, ku morën pjesë në takimin e ministrave të Jashtëm të Procesit të Berlini.
Gërvalla tha se duhet të ketë njëherë ndëshkim për Serbinë nga ndërkombëtarët dhe më pas dialog. Ajo theksoi se e rëndësishme është siguria e qytetarëve.
Ministrja e Jashtme e Kosovës, Donika Gërvalla në një deklaratë për mediat pas takimit me homologen gjermane, Annalena Baerbock, theksoi se nuk do të rikthehen në dialog me Serbinë për sa kohë faktori ndërkombëtar nuk vendos sanksione ndaj Serbisë për sulmin e pak ditëve më parë në veri.
“Të merren të gjitha masat që një gjë e tillë jo vetëm që të mos përsëritet në Kosovë por as në vendet e tjera të rajonit, të cilat pavarësisht problemeve që ka Kosova me Serbinë, kanë problemet e tyre sepse Serbia sillet si një mini Rusi e vogël e cila cdo shtet fqinj të saj e trajton në atë mënyrë që mendon se ata nuk kanë të drejtën e tyre, të ndërtojnë të ardhmne por të jenë pjesë e shtetit serb.
Gjermania është një nga mbështetësit kryesorë të Kosovës. SHBA-të, Mbretëria e Bashkuar, shumë shtete të BE-së janë të shqetësuara për ngjarjet në Kosovë, sulmin në Veri, i cili po të mos ishte ndalur, sot do të kishim territor të pushtuar dhe biseda të tjera. Është e rëndësishme të kuptohet mesazhi dhe të merren të gjitha masat që një gjë e tillë të mos përsëritet as në Kosovë dhe as vendet e tjera që kanë probleme me Serbinë, e cila sillet si një mini rusi e vogël dhe mendon se ato vende nuk kanë të drejtat e tyre.
Prioritet i institucioneve të Kosovës këto ditë është siguria. Ne duhet të sigurohemi që armët e sekuestruara janë pjesa më e madhe e armëve të futura. Për sigurinë kemi nevojë për partnerët dhe miqtë tanë. Si do vazhdojë procesi, natyrisht që zgjidhja do jetë nga dialogu, por cili do jetë momenti, varet nga bashkësia ndërkombëtare. Nëse e lënë pa ndëshkim, ne e shohim të pamundur dialogun. Duhet të ketë prioritet siguria. Dialogu nuk duhet të jetë sa për foto dhe shkëmbyer mendime, por të premtojë sukses. Me një partner dialogu i cili bën sikur ulet me ty për të diskutuar dhe në anën tjetër ngre kampe ushtarake, është e vështirë”, deklaroi Gërvalla.
Ajo theksoi se që të kemi sukses në këtë proces, duhet që procesi i dialogut të premtojë.
“Kosova është pala e vetme që kërkon me ngulm implementimin e asaj marrëveshjeje. Ne i kemi kërkuar bashkësisë ndërkombëtare të vendosë sanksione ndaj Serbisë. Është e qartë se pa sanksione nuk ka për ta mësuar mësimin. Dhe qytetarët e Serbisë do ta kenë të vështirë për ta ngritur zërin ndaj vendit të tyre që sillet në mënyrë agresive ndaj fqinjëve”, tha ministrja e Jashtme e Kosovës./m.j
