Futbollisti i Tiranës, Gentian Muça, ka shprehur habinë për pezullimin njëvjeçar nga ana e Komisionit të Disiplinës. Zëvendëskapiteni bardheblu u dënua për shkak të thirrjeve në përfundim të ndeshjes kundër Partizanit, ku ai iu drejtua tifozëve me megafon.
Muça e mësoi dënimin dje gjatë stërvitjes, të cilën e braktisi menjëherë. Sot lojtari ka dalë para medias dhe ka folur për vendimin e disiplinës, duke shprehur habinë.
“Jam njohur dje gjatë stërvitjes me vendimin dhe jam habitur shumë. Ai ishte nje komunikim i imi me tifozët, unë nuk nxis dhunë dhe as bëj thirrje raciste. Jam praktikant feje”, tha Muça, i cili vuri në dukje se nuk ka qenë asnjëherë më parë problem dhe objekt i Komisionit të Disiplinës.
“Emri im për 10 vite nuk ka qenë kurrë në zyrat e Disiplinës, për këtë arsye kam shumë besim tek Apeli, pasi më shkatërrohet karriera në kulmin tim”, tha Muça.
Më tej shtoi se “nuk besoj se u mërzit njeri nga thirrjet kundër komunizmit, sistem që i ka dërrmuar shqiptarët”.
Por, thirrja e Muçës “mbyti komunistët” në të vërtetë nuk u drejtohej komunistëve, por klubit Partizani dhe tifozëve të tij, duke i etiketuar si komunistë, çka përbën edhe shkakun e hetimit dhe dënimit të marrë kundër tij. E njëjta gjë vlen edhe për përmendjen e emrit të Beogradit, qytet që gjithashtu ka skuadër me emrin Partizan.
D.Ikonomi
