Kreu i Kombeve të Bashkuara ka kërkuar “të vërtetën” për zhdukjen e gazetarit saudit Jamal Khashoggi.
Sekretari i Përgjithshëm Antonio Guterres i tha BBC-së se kishte frikë se zhdukje të tilla do të ndodhnin më rregullisht dhe do të bëheshin si gjëra “normale”
Khashoggi, një kritik i qeverisë saudite, u zhduk më 2 tetor pasi vizitoi konsullatën e tij në Stamboll.
Arabia Saudite thotë se akuzat se është urdhëruar vrasja e tij është një “gënjeshtër“.
Ministri i Brendshëm, Princi Abdulaziz bin Saud bin Naif bin Abdulaziz, në disa reagime të raportuara nga agjencia zyrtare e shtypit Saudite të premten, tha se mbretëria ishte gjithashtu e gatshme të zbulonte “të gjithë të vërtetën“, por shtoi se akuzat se ishin lëshuar urdhra për të vrarë Khashoggi ishin “të pabaza“.
Një burim turk i sigurisë i ka thënë BBC-së se zyrtarët kishin prova audio dhe video që dëshmonin se Khashoggi, i cili shkruan për Washington Post, u vra brenda konsullatës.
Arabia Saudite ka qenë nën presion për të shpjeguar se çfarë ka ndodhur me Khashoggi pasi hyri në ndërtesën e konsullatës në orën 14.14 të datës 2 tetor. Turqia ka pohuar se gazetari dhe kritiku në azil i princit të kurorës Mohammed bin Salman u vra nga një skuadër elitë e dërguar nga Riad. Autoritetet në Stamboll kanë lënë të kuptohet se mbajnë prova të pazbuluara që vërtetojnë se çfarë ndodhi, raporton “The Guardian”.
Hatice Cengiz, e fejuara turke e Khashoggi, i tha Associated Press të premten se Khashoggi kishte veshur një orë Apple kur hyri në konsullatë dhe hetuesit po shqyrtonin celularët e tij, të cilat ai kishte lënë me të.
Gazetari i zhdukur mund të ketë regjistruar vdekjen e tij në orën e tij Apple.
Ai e futi atë në funksionin e regjistrimit përpara se të hynte në ambasadën e Arabisë Saudite në Stamboll më 2 tetor, sipas gazetës turke Sabah.
Pastaj “marrja në pyetje, tortura dhe vrasja e tij u regjistrua në audio dhe u dërgua në telefon dhe në iCloud“, thuhet në raportin e gazetës.
Sulmuesit e tij u përpoqën të hynin në orë me shumë përpjekje por të dështuara për fjalëkalimin përpara se të përdorin gjurmët e gishtave për ta zhbllokuar dhe fshirë disa regjistrime, pohon raporti.
Forcat e sigurisë që drejtojnë hetimin për zhdukjen e gazetarit gjetën regjistrimin audio në telefon që ai ia kishte lënë të fejuarës së tij, sipas gazetës.
Megjithatë, zhbllokimi i një ore Apple duke përdorur verifikimin e gjurmëve të gishtërinjve nuk është një veçori e pajisjes, tha një përfaqësues i Apple për CNN.
Është gjithashtu e paqartë se si regjistrimi është transferuar nga ora në telefon.
Bisedat mes atyre që përfshiheshin në vrasjen e dyshuar të Khashoggi u regjistruan në ambasadë, njoftoi më parë edhe Washington Post, por gazeta nuk ishte e qartë se si këto regjistrime ishin bërë ose si u gjetën më vonë.
Një grup aktivistesh u mblodhën të mërkurën përpara ambasadës saudite në Washington, për të kërkuar përgjigje rreth zhdukjes së Khashoggit dhe për të shprehur dyshimin se ai është vrarë me urdhër të princit të kurorës Mohammed bin Salman. Ligjvënësit amerikanë nga të dyja partitë thonë se nëse sauditët janë përgjegjës për zhdukjen e Khashoggit, administrata e Presidentit Trump duhet të veprojë.
a.ç
