Një nga gazetarët më të famshëm të politikës në Gjermani, Reinhard Veser, ka shkruar për zhvillimet e fundit në Veri të Kosovës, derisa kryeministrin Albin Kurti e ka quajtur konsistent në kundërshtimin e tij ndaj “aleatëve perëndimorë”, duke thënë se politikat e tij mund ta kenë dëmtuar Kosovën përgjithmonë.
Veser, në shkrimin e tij në gazetën Frankfurter Allgemeine Zeitung, thotë se “Kurti nuk arriti të kuptojë rëndësinë e qetësisë në Ballkan për Perëndimin përballë sulmit të Rusisë ndaj Ukrainës”.
“Kryeministri i Kosovës, Albin Kurti, ka një histori të gjatë konfrontimi me aleatët perëndimorë të vendit të tij. Ai dikur udhëhoqi protesta kundër misionit të OKB-së në Kosovë dhe kundër planit të paqes të OKB-së për konfliktin me Serbinë.
Që në fillim, ai kundërshtoi gjithashtu marrëveshjet me të cilat BE donte të normalizonte marrëdhëniet mes Serbisë dhe Kosovës. Pra, ai është konsistent në sabotimin e zbatimit të tyre si kreu i qeverisë”, shkruan Veser.
Këto qëndrime, Veser i ka konsideruar si “kokëfortësi me të cilën ai po e dëmton vendin e tij – ndoshta përgjithmonë”.
Gazetari shkruan se Kurti ka bërë bixhoz me mbështetjen e SHBA-së dhe BE-së për Kosovën.
“Brukseli dhe Uashingtoni tani e konsiderojnë Kosovën si problematike në Ballkan, jo Serbinë. Dhe kjo përkundër faktit se Beogradi nuk e ka ndryshuar qëndrimin pengues me të cilin gjithmonë ka penguar zgjidhjen e konfliktit”.
“Me sa duket Kurti nuk e ka kuptuar se sa e rëndësishme është qetësia në Ballkan për Perëndimin përballë luftës së agresionit rus në Ukrainë. Politikani cinik i pushtetit Aleksandër Vuçiç është i një kalibri tjetër në Beograd. Ai drejton propagandën pro-ruse për përdorim të brendshëm – dhe furnizon Ukrainën me armë”, shkroi Veser.
/a.r
