Flet Gaz Paja: Tirana ka nevojë për një Teatër të Ri Kombëtar. Marrëveshja e PD për qëllime politike
Aktori i njohur i humorit Gazmend Paja e cilëson të domosdoshme ndërtimin e një godine të re të Teatrit Kombëtar, pasi ai aktuali nuk ofron as kushtet më minimale për artistët, por dhe për spektatorët.
Në një intervistë për “Mapo”, Paja ka argumentuar qëndrimin e tij pro shembjes së godinës aktuale të teatrit dhe jo vetëm.
“Unë jam pjesë e komunitetit artistik dhe kam pasur nderin të luaj në disa premiera në skenën e Teatrit Kombëtar. Pra, kam pasur mundësinë ta prek fizikisht skenën dhe çdo ambient të teatrit. Tashmë jam i bindur që ky teatër i nderuar është plakur deri në pikën që nuk ofron dot më as kushtet minimale që një artist të shpalosë artin e vet në të. Një Teatër i ri do të na jepte mundësinë të përfaqësohemi me dinjitet e profesionalizëm përballë kolegëve tanë nëpër botë. Ju siguroj me bindje që Shqipëria ka shumë artistë të zotë dhe ka nevojë për një teatër dinjitoz. Në shumë vende të botës teatrot janë në zemër të qytetit, pra bota e ka dhënë në një farë mënyre përgjigjen e saj”, thotë Paja.
Aktori Paja është i mendimit se marrëveshja e nënshkruar nga Partia Demokratike, ka veçse karakter të pastër politik.
“Është për të ardhur keq që këto marrëveshje të cilat bëhen për interesa të pastra politike, po tentojnë të lënë pas një projekt që do të nderojë secilin nga ne, madje dhe ata që po luftojnë ta pengojnë sot. M’u dha mundësia të kem opinionin dhe vendimin tim në të mirë të qytetit. Me këtë rast dua të sqaroj pozicionin tim të qartë në këshillin bashkiak. Jam aty, sepse besoj në projektin dhe vizionin e Erion Veliajt për Tiranën dhe Teatri i ri Kombëtar është një nga projektet e tij në mandatin e dytë”, tha aktori i njohur Gazmend Paja.
